Amerika Quşma Ştatları (AQŞ) Berläşkän Millätlär Oyışması (BMO) İminlek Şurasına ilbaşı Donald Trampnıñ 20 maddädän torğan Ğazzä tınıçlıq planın nığıtu öçen rezolyutsiya proyektın täqdim itte. Bu proyekt xalıqara iminlek köçlären (ISF) röxsät itüne dä küzdä tota, dip belderde AQŞ missiyase.

AQŞ ilçese Mayk Volts bu proyekt belän İminlek Şurasınıñ saylanğan 10 äğzasın häm töbäktäge partner illär — Törkiyä, Misır, Qatar, Berläşkän Ğäräp Ämirlekläre häm Sogüd Ğaräbstanın tanıştırdı, dip belderde AQŞ missiyase süzçese çärşämbe könne.

Proyekt öçen tawış birü köne älegä bilgelänmägän.

AQŞ belderüendä äytelgänçä, rezolyutsiya Trampnıñ 20 maddädän torğan planında küzdä totılğan Ğazzä öçen waqıtlı idarä organı "Tınıçlıq Şurasın" xuplıy. AQŞ ilbaşı bu şura belän üze citäkçelek itäçäk.

Şulay uq, bu rezolyutsiya tınıçlıq planında küzdä totılğan "Xalıqara tınıçlıq köçlären"ä [ISF] wäqalät birä.

Diplomatik çığanaqlar mäğlümatına qarağanda, berniçä il missiyädä qatnaşırğa äzer buluların beldergän, läkin Fälästin cirenä ğäskärlär cibärü öçen İminlek Şurası mandatın taläp itälär.

"İlbaşı Trampnıñ qıyu citäkçelege astında, AQŞ BMOda, betmäs-tökänmäs söyläşülär tügel, näticälärgä ireşäçäk," dip belderde Amerika süzçese.

Xalıqara köçlärneñ tözelüe 10 oktyaberdä İzrail belän “Xamas” arasında ireşelgän utnı tuqtatu kileşüeneñ töp öleşe bulıp tora.

Kileşü nigezendä, ğäskärlär kübräk ğäräp häm möselman illärennän cıyılaçaq häm İzrail ğäskärläreneñ Ğazzä cirennän çigenüe waqıtında iminlekne täêmin itü öçen urnaştırılaçaq.

"Yaqlar bu tarixi mömkinlektän faydalanıp, yıllar buyına suzılğan qan qoyunı tuqtatu häm ilbaşınıñ Yaqın Könçığışta daimi tınıçlıq turındağı küzallawın tormışqa aşıru öçen adım yasadı," dip östäde AQŞ süzçese.

Trampnıñ planınıñ kiläse êtapları Ğazzä cirennän İzrailneñ tulısınça çigenüen, “Xamas”nıñ qoralsızlandırıluın häm Fälästin cirläreneñ yañadan tözekländerelüen üz êçenä ala.