Cirle mediadağı xäbärlärdä äytelgänçä, Sudan Operativ yärdäm köçläre  cibärgän 1  pilotsız oçu apparatınıñ  Tön’yaq Darfur vilayäteneñ başqalası Äl-Faşirdä tınıç xalıq cıyılğan urınğa höcüm itüe näticäsendä pänceşämbe könne tınıç xalıqtan kim digändä 5 keşe hälaq bulğan, 10nan artıq keşe yaralanğan.

Waqıyğa pänceşämbe könne bulsa da, bu xaqta comğa könne xäbär itkännär.

Cirle çığanaqlar “Sudan Tribune” ga beldergänçä, Operativ yärdäm köçläreneñ “intixar dronı” şähär üzägendäge bazarda şartlağan häm näticädä 5 keşe ülgän, 10 keşe yaralanğan.

Monnan tış, waqıyğa şahitları comğa könne “Sudan News”qa Sudan armiyäse hawa saqlanu sistemalarınıñ Xartum xalıqara aêroportı östennän oçqan häm Operativ yärdäm köçläre tarafınnan cibärelgän pilotsız oçu apparatların totqarlawın häm monıñ inde dürt kön däwam itüen xäbär itkän.

Operativ yärdäm köçläre sişämbe könne aêroportqa häm Xartumdağı başqa möhim ob’yektlarğa höcümnär başlatqan ide.

 Bu höcümnär ike yıldan artıq yabıq torğan aêroport qabat êşli başlawğa äzerlängän waqıtqa turı kilde.

Aêroport çärşämbe könne berençe grajdan yulçı oçışın qabul itte.

Bu waqıyğalar turında ğıys’yancı törkemnän älegä belderü yasalmağan.

 Armiya belän Operativ yärdäm köçläre arasındağı suğış 2023 yılnıñ aprelennän birle däwam itä.

 BMO häm cirle räsmi zatlar beldergänçä, bu suğış näticäsendä 20 meñnän artıq keşe hälaq bulğan, 14 millionğa yaqın keşe isä yäşägän cirlären taşlap kitärgä mäcbür bulğan.