AQŞ ilbaşı Donal'd Tramp Tön'yaq Koreyanıñ atom -töş  qoralların sınawçı berdänber däwlät tügellegen, Rusiya häm Qıtaynıñ da sınap qarawlar ütkärüen belderde. Tramp bu fikerne “CBS News” nıñ “60 Minutes” programına birgän  interv'yusında citkerde.

Tapşırunı alıp baruçı Norah O'Donnell Tön'yaq Koreyanı atom -töş qoralın sınawçı berdänber däwlät dip äytkännän soñ Tramp süzgä quşılıp “Rusya sınaw ütkärä, Qıtay sınaw ütkärä, läkin berkem dä bu xaqta söylämi” dip äytte. Tramp bu süzlärne AQŞ armiyäsenä 30 yıldan artıq waqıt uzğannan soñ atom -töş qoralı sınawnı yañadan başlaw turında boyırıq birgännän soñ 3 kön ütkäç äytte.

“Başqa däwlätlär sınaw ütkärä. Bez isä sınaw ütkärmägän berdänber däwlät häm min mondıy il bulırğa telämim” dip äytte Tramp häm bu däwlätlärneñ üz qoralların qayda sınawların belüneñ mömkin tügellegen assızıqladı.

“Zur atom köçe”

Tramp atom -töş qoralların qullanırğa telämäwen yañarttı häm alarnıñ niçek êşläwen tikşerü öçen sınap qaraw kiräklegen äytte. “Bu mäğ’näle tügelme? Sez atom -töş qoralı yasıysız , annarı anı sınap qaramıysız. Monı niçek êşlisez? Anıñ êşläw-êşlämäwen qaydan beläsez?” dide ul.

Tramp şulay uq AQŞnıñ zur atom köçenä iyä buluın häm bu köçneñ başqa illargä qarağanda kübräk buluına basım yasadı.

 “Rusiya ikençe urında. Qıtay isä öçençe urında, ul şaqtıy artta qala, läkin 5 yıldan alar tigezläşäçäk. Alar bik tiz citeşterälär  häm bez atom -töş qorasızlanuı ölkäsendä närsäder êşlärgä tiyeş. Dön’yanı 150 tapqır yuq itärlek atom - töş qoralıbız bar. Rusiyäneñ atom - töş qoralı küp häm Qıtayda da alar küp bulaçaq”,-dide ul.