Ukraina liderı Volodimir Zelenskiy AQŞ däwlät başlığı Donald Trampnıñ tänqıytlärennän soñ yasağan belderüendä Rusiyä ilbaşı Vladimir Putin 60 könlek utnı tuqtatunı qabul itkän oçraqta Ukrainada saylaw uzdıraçaqların citkerde.

Zelenskiy “ABC”ğa birgän intervyuda bolay dide: “Putinğa äytegez, zinhar, 60 köngä utnı tuqtatsın. 60 kön êçendä bez saylawlar ütkärerbez.”

AQŞ Rusiyä yağulığına sankśiyalärne waqıtlıça betergännän soñ ber kön ütkäç Tramp şimbä könne Zelenskiynı Rusiyä neft êşkärtü zavodlarına höcüm itkäne öçen tänqıytlägän ide.

Tramp Aq Yortta jurnalistlarğa yasağan belderüendä: "Minemçä, Ukraina öçen yaña ilbaşın saylaw waqıtı citte," — dide.

Trampnıñ süzlärenä cawap itep Zelenskiy däwlät başlığın saylawnıñ ukrainalılar qararı buluın citkerde, Putinnıñ da Ukraina citäkçelegeneñ almaşınuın teläwen assızıqladı.

Zelenskiy Yaqın Könçığıştağı suğış arqasında yağulıq bäyäläreneñ artuı böten dönyağa bilgele buluın häm bäyälärneñ artuında Ukrainanı ğayepläw ciñel buluın belderde.