Gretsiyä belän Törkiyä arasındağı Bahçäköy (Kipi) çik buyı kontrol noqtası sişämbe kiçendä grek fermerlarınıñ protestları säbäple yök häm awır texnika öçen yabıldı.

Çik buyı xezmätkärläre “Anadolu agentlığı”na citkergänçä, şäxsi maşinalarnı ütkärü ğadättägeçä däwam itä häm fermerlar belän xökümät arasında söyläşülär bara.

Gretsiyä buyınça oyıştırılğan protestlar qısalarında fermerlar qayçaq şähärara yullarnı da yaba.

Yäkşämbe könne protestta qatnaşqan grek fermerları üzäk şähär bulğan Larissa yänäşäsendä politsiya belän bäreleşte.

Fermerlar citeşterü çığımnarı artu, kompensatsiyälärneñ kiçegüe häm däwlätneñ awıl xucalığı tüläwläre agentlığı “OPEKEPE” belän bäyle mäs'älälär säbäple rizasızlıq kampaniyälären köçäytergä niyätli.

İyun' ayında Awrupa Komissiyase 2016nçı yılda başlanğan awıl xucalığı subvensiyäläre belän bäyle zur külämdä aldap aqça üzläşterüe öçen Gretsiyägä yaqınça 453,4 million dollar ştraf saldı.

Bu ştraf “OPEKEPE”neñ küzätüdäge xilaflıqları arqasında bula. Aqçalarnıñ tiyeşençä qullanılmawı açıqlanğannan soñ oyışma may ayında tarqatıldı.