İlbaşı Räcäp Tayyip Ärdoğan İstanbulnıñ ciñep alınuınıñ 573 yıllığı uñayınnan yasağan çığışında bu waqıyğanı tarixi xärbi ciñü genä tügel, ä şähärgä tınıçlıq, iminlek häm yañarış kitergän borılış noqtası dip tä atadı.

Comğa könne Haliç kongress üzäge baqçasında “Ğadälät häm üseş” partiyäse tarafınnan oyıştırılğan “İstanbulnıñ ciñep alınuınnan yöräklärne yawlap aluğa qadär” digän çarada çığış yasağan Törkiyä ilbaşı Ärdoğan 1453 yılda Fatix Soltan Mäxmät citäkçelegendä İstanbulnı ciñep aluda qatnaşuçılarnı iskä aldı.

Ärdoğan bolay dide:

«Min bu mäğnäle köndä, monnan töğäl 573 yıl êlek İstanbulnıñ ciñep alınuında qatnaşqan, bu şähärdä şähit bulğan häm ğazıy bulğan härkemne, şulay uq 21 yäşendä İstanbulnı ciñep aluğa ireşkän danlıqlı komandir Fatix Soltan Mäxmätne  olı xörmät häm  räxmät belän iskä alam”.

İlbaşı İstanbulnıñ ciñep alınuı zur ciñü genä , ber çornıñ başın häm axırın bilgelägän waqıyğa ğına tügel, ä dönyanıñ iñ qäderle şähärlärennän bersendä qaranğılıqnıñ yaqtılıqqa äwerelüe buluın belderde.

Ärdoğan İstanbulnıñ 1453 yıldan birle millätneñ iñ qäderle miraslarınnan berse buluın assızıqladı.