“Xizbullah” ğomum särqatibe Naim Kasım üz törkemeneñ üzen niçek kenä bulmasın yaqlayaçağın äytte häm İzrailgä maksimum däräcädä qarşı torırğa wäğ’dä birde.

Ul televideniyedäge çığışında “Xizbullah”nıñ İzrailgä qarata raketa höcümnären İzrailneñ 15 aylıq xoquq bozularına, şul isäptän Xamänäineñ üterelüenä cawap dip atadı.

“Bez saylağan yul — doşmanğa maksimal’ däräcädä qarşı toru, bez birelmäyäçäkbez”,- dip äytte ul.

Kasım  soñğı 15 ayda İzrail höcümnärendä 500 keşe hälaq buluın da belderde.

“Basıp alu bulğan waqıtta qarşılıq kürsätü häm qorallar - qanuni xoquq”,- dip östäde ul.

Kiyerenkelek arta

 Düşämbe könne “Xizbullah” raketalar häm pilotsız oçu apparatları belän tön’yaq İzraildä  xärbi punktnı nişan itep alğannan soñ Livanda kiyerenkelek arttı.

“Xizbullah” süzlärençä, bu höcüm däwam itkän İzrail hawa höcümnärenä häm Ali Xamänäineñ üterelüenä cawap bularaq başqarılğan.

İzrail armiyäse ber-ber artlı hawa höcümnäre oyıştırdı; kim digändä 72 keşe hälaq buldı, yaqınça 450 keşe yaralandı.

İzrail armiyäse şulay uq könyaq Livanğa ciröste operaśiyäse dä başladı.

İzrail 2024 yılnıñ noyabrendä “Xizbullah” belän imzalanğan utnı tuqtatu kileşüen küp tapqırlar bozdı; kön sayın diyärlek höcümnär yözlärçä keşeneñ ülemenä häm yaralanuına kiterde.

Şul uq waqıtta AQŞ häm İzrail şimbä könennän birle İranğa qarşı kiñ qırlı höcümnären däwam itä.

Xäbärlärgä qarağanda, bu höcümnärdä yaqınça 900 keşe, şul isäptän İrannıñ dini liderı Ali Xamänäi häm yuğarı däräcäle xärbi wäqalätlelär hälaq buldı.