Ministr Fidannıñ Finlyandiya Parlamentında Törkiyä-Finlyandiya xezmättäşlege mäs’äläsendä çığış yasawı da kötelä.
Törkiyä tışqı êşlär ministrı Xaqan Fidan sişämbe könne bu ilgä säfär yasadı. Fidan säfäre qısalarında Finlyandiya tışqı êşlär ministrı Êlina Valtonen belän küreşäçäk.
Törkiyäneñ diplomatik çığanaqlarına kürä törek ministrınıñ Tönyaq Awrupa ilenä yasağan ike könlek bu säfäre waqıtında ber törkem söyläşü ütkärüe planlaştırıla.
Xaqan Fidan may ayında Antaliyadä oyıştırılğan räsmi bulmağan NATO tışqı êşlär ministrları cıyılışında qabul itkän Valtonen belän küreşäçäk, şulay uq Finlyandiya Parlamentı başlığı belän dä küreşep söyläşäçäk.
Fidan säfär waqıtında Finlyandiya Parlamentında oyıştırılaçaq “Törkiyä-Finlyandiya xezmättäşlege” isemle çarada çığış yasayaçaq.
Ministrnıñ Finlyandiyadä yäşäwçe tatar cämğıyäte äğzaläre belän dä oçraşuı kötelä.
Xaqan Fidannıñ söyläşülärendä şulay uq säwdä, investiśiya häm saqlanu sänägäte ölkälärendä ike yaqlı fayda nigezendä ike il xezmättäşlegeneñ tiränäytelüe häm törländerelüeneñ ähämiyätenä basım yasawı planlaştırıla.
Ministr Änkara citäkçelegeneñ Xelsinki citäkçelege belän mäğlümati texnologiyalär, kiber qurqınıçsızlıq, finans texnologiyalär häm yañartıla torğan ênergetika kebek ölkälärdä xezmättäşlekne arttırırğa äzer buluın citkeräçäk.
Törek ministrı qotıp töbägendäge urtaq iniśiativalarnıñ mönäsäbätlärgä yaña vizion täêmin itä alaçağın äytäçäk häm Finlyandiyadäge töreklär belän tatarlarnıñ ike il arasındağı köçle gumanitar bäyläneşlärne çağıldıruın assızıqlayaçaq.
Fidannıñ şulay uq Finlyandiyaneñ Törkiyäneñ Awrupa berlegenä äğza bulu barışın xuplağanı öçen räxmät belderüe häm Änkara citäkçlegeneñ Tamğaxanä berlegeneñ modernizaśiyase belän vizadan azat itü dialogında alğarış mäs’äläsendäge kötkännären urtaqlaşuı kötelä.
Törkiyä häm Finlyandiyaneñ küp yaqlı platformalarda global tınıçlıq öçen urtaq tırışlıqlarnı däwam itterüeneñ ähämiyätenä iğtibarnı yünältäçäk ministr Fidan Berlӓşkӓn Millӓtlӓr Oyışması häm Awrupa iminlek häm xezmättäşlek oyışması êçendä ike il räistäş bulğan Aradaşçılıq dusları törkemeneñ ähämiyätenä basım yasayaçaq.
Xaqan Fidan Rusiyä-Ukraina suğışında ğadel häm daimi tınıçlıq urnaştıruğa qarağan xalıqara tırışlıqlarda häm diplomatik barışlarda qulaylaştıruçı rol uynarğa äzer buluların qabatlayaçaq.
Törkiyä häm Finlyandiya arasındağı diplomatik mönäsäbätlär 1924 yılda Duslıq kileşüeneñ imzalanuı belän qorıldı.
Uzğan yılnı ike il arasındağı säwdä küläme yaqınça 1,8 milliard dollarğa citte.
2024 yılda 123 meñ tiräse Finlyandiya turistı Törkiyägä kilde.
