Kambodja Tailandnıñ “F-16” xärbi oçqıçları belän Preax Vixear töbägenä hawa höcümnäre oyıştıruın belderde. Cirle matbuğat çaraları pänceşämbe könne irtän Tailand köçläreneñ Pxnom Kmoç häm Peak Sbeak rayonnarın bombalawın yaza.

Başqa bir mäğlümat çarası Tailand patşa ğaskärläreneñ xalıqara aldaw çeltärläre qullana torğan altıdan artıq bina, şul isäptän, qomarxanälär häm qunaqxanälärne yuq itüen citkerde.

İke däwlät arasında bäreleşlär başlanğanğa 12 kön buldı. İke yaqta da tulayım ülüçelär sanı, kimendä, 55 bularaq belderelde.

AQŞ ilbaşı Donald Tramp comğa könne Tailand häm Kambodja liderlarınıñ qabat başlanğan bäreleşlärne tuqtatu mäsäläsendä kileşülären äytkän ide, ämma kiyerenkelek haman däwam itä.

İke il ozaq waqıttan birle çik buyı mäsäläsendä añlaşa almıy. Bu küp tapqırlar dähşätle waqıyğalarğa kiterde. İyül ayında bulğan bäreleşlärdä, kimendä, 48 keşe ülde.