“CNN” sişämbe könne xäbär itüençä AQŞ citäkçelege immigrant balalarnı deportaśiyaläwne tizlätergä planlaştıra. Xäbärdä mäğlümat citäkçelek wäkillärennän häm balalarnı yaqlawçı advokatlardan alınğan dip äytelä.

İmmigrant balalarnıñ AQŞta qalıp qalmawın xäl itüçe mäxkämälär küpkä irtäräk datalarğa bilgelänä. Bu advokatlarğa balalarğa yärdäm itüne qatlawlandıra.

Xäbärdän kürengänçä xätta dürt yäşlek balalar da qaywaqıt mäxkämägä qabat-qabat kilergä häm mäxkämä êşe turında qısqa waqıt êçendä qayçaq yuridik wäkilsez mäğlümat birergä mäcbür itelä.

AQŞta urnaşqan “Kids in Need of Defense” ictimağıy oyışma wäkile Êmili Norman äytüençä bu yış tıñlawlar yuridik sistemağa yaraqlaşırğa tırışuçı balalar öçen stresslı bulırğa mömkin. Norman küp balanıñ zur basım kiçerüen häm qayberläreneñ tıñlawlar aldınnan astına siyüen belderde.

Bu adım ata-anaları totqarlanğannan soñ yalğız kilgän yäki däwlät qaramağına qaytarılğan baliğ bulmağan balalarğa immigraśiya kontrolen köçäytü tırışlıqlarınıñ ber öleşe bularaq yasaldı.

Advokatlar häm êkspertlar tizlätelgän mäxkämä barışı grafiğı yaqlawsız balalarnıñ qurqınıç şartlarğa kire qaytarıluına kiterergä mömkin dip kisätte. Xisapka kürä Texasta sıyınu urınnarındağı yaqınça 300 bala öçen mäxkämä barışı kötmägändä, yış qına aldan xäbär itmiçä, alğa küçerelde.

Sälamätlek saqlaw häm sośial xezmätlär ministrlığı isemennän “CNN”ğa yasağan belderüendä wäkil Êndryu Nikson ministrlıknıñ ozatuçısız qalğan balalar êşlären qanun nigezendä mömkin qadär tiz häm näticäle räweştä xäl itügä yünältelgänen citkerde.

Xäbärdä şulay uq migrant balalarnıñ urtaça cide ay buyı totqarlanuları, monıñ êlekkege totqarlanu waqıtınnan küpkä artıp kitüe bilgeläp ütelde.

24 ştatta ozatuçısız qalğan migrant balalarnı qaraw öçen uçrejdeniyelar häm programmalarnı finanslawçı Sälamätlek saqlaw häm sośial xezmätlär ministrlığı qaramağında mart ayında 2 meñnän artıq migrant balası bar ide.