Avstraliya xökümäte räise Êntoni Albaneze sişämbe könne kön'yaq Sidneyda urnaşqan xastaxanägä barıp 15 keşe ülgän Bondi plyajı höcümendä ber atuçını tuqtatqan möselman Äxmät äl-Äxmätneñ xälen beleşte.

Ul ike bala atası 43 yäşlek ir-atnı batırlığı öçen maqtadı häm anı terrorçılıq qarşısında milli berlekneñ simvolı dip atadı.

Xastaxanägä barğannan soñ Albaneze “X” platformasında: "Äxmät, sin Avstraliya batırı. Başkalarnı qotqaru öçen üz tormışıñnı qurqınıç astına quydıñ. Iñ awır waqıtlarda bez avstraliyalılarnıñ iñ yaxşı yaqların küräbez",- dip yazdı.

Höcümçelärneñ bersenä taşlanğan äl-Äxmät anıñ qoralın tartıp ala häm birelergä mäcbür itä. Tik şul uq waqıtta üze dä citdi räweştä yaralana. Gäwdäsenä bik küp yädrä êläkkän häm qulı belän cilkäse yaralanğan äl-Äxmätneñ xälen xastaxanä wäqalätleläre totrıqlı dip belderde.  

Oçraşudan soñ Albaneze jurnalistlarga söylägändä qurqu yäisä näfrätneñ ilne bülüenä yul quymasqa kiräklege turında kisätte.

15 üle, 41 yaralı

Politsiya höcümneñ yäkşämbe kiçendä Bondi plyajında 50 yäşlek ir-at häm anıñ 24 yäşlek ulınıñ cıyılğan xalıqqa ut açuı belän başlanuın belderde. Waqıyğada 15 keşe üterelde häm, kimendä, 42 keşe yaralandı. Alarnı Sidneynıñ törle xastaxanälärenä iltälär.

Politsiya beldergänçä, höcüm itüçelärneñ berse şunda uq atıp üterelde, ikençese yaralandı häm kritik xäldä tabiblar küzläwe astında. Wäqalätlelär bu waqıyğanı räsmi räweştä terrorçılıq dip atadı, anıñ mömkin säbäplären häm bäyläneşlärne tikşerü däwam itä.