İndoneziyanıñ Yava utrawında cimerelgän mäktäp binası yanında distälägän ata-ana cıyıldı, qotqaru törkemnäre cimereklär astında isän qalğannarnı ezläde.

Milli afät belän idarä itü agentlığı mäğlümatlarına kürä Sidoardjo şähärendä tözeleş barğan küp qatlı bina cimerelde, kim digändä öç keşe ülde, 38 keşe yuğaldı.

42 yäşlek Qoyyimah küp kenä indoneziyalılar kebek internat-mäktäp yanında ulınnan xäbären kötä.

Madura utrawında yäşäwçe Qoyyimah: “Faciğa turında monda yäşäwçe tuğannarımnan işettem. Şaqqattım. Bernärsä dä êşli almadım. Tüzä almadım, kilep cittem, bik borçılam” – dide.

Yaña tözeleş

Qotqaru törkemnäre êşlägändä yar buyında barlıqqa kilgän cirteträw alarnıñ êşen waqıtlıça tuqtatırğa mäcbür itte.

Cirle mäğlümat çaraları citkergänçä ber mäktäp wäkile mäktäptä soñğı 9 ayda tözeleş êşläre alıp barıluın äytte.

Milli afät belän idarä itü agentlığ süzçese Abdul Muxariğa kürä fundament mäktäpneñ dürtençe qatındağı yaña tözeleşne kütärä almağan.

İndoneziyadä tözeleş standartlarınıñ zäğıyf buluı, bigräk tä tözelep betmägän yortlar häm byudjet bulğanda kübräk qat tözü arqasında bina iminlege mäs’äläläre borçu tudıra.

Bu ay başında Könbatış Yavada bina cimerelep, öç keşe ülde, distälägän keşe yaralandı.