AQŞ-İran söyläşüläre turındağı sorawğa cawap birüçe Fidan: "Här ike taraf da uñay näticägä ireşergä teli. Kileşügä êlekkegä qarağanda da yaqınraq”, - dip äytte.
Fidan AQŞ, İzrail häm İran arasında utnı tuqtatu täêmin itelgännän soñ söyläşülärneñ Ormuz buğazına yünälüen äytte.
Ormuz buğazınıñ ğamäli qamalışınıñ häm AQŞ häm dä İran östendä "bik artıq zur basım buldıruın" häm "xalıqara yoğıntısınıñ bik zur buluın" belderüçe Fidan bu wazğiyätneñ atom-töş êşläre belän bäyle mäs’älälärdän dä möhimräk bulıp kitüen belderde.
AQŞ İlbaşı Donald Trampnıñ Soğud Ğäräbstanı, Berläşkän Ğäräp Ämirlekläre, Qatar häm başqa töbäk illäreneñ Abraham kileşüenä quşıluın täqdim itüe turındağı soraw unayınnan Fidan Törkiyäneñ 2023nçe yılnıñ 7nçe oktyabrennän äwwälge İzrail belän bulğan tarixi häm säwdä bağlanışlarına iğtibarnı yünältte.
"İzrail tağın da kübräk cirgä omtıla"
Ministr Fidan: "(İzrail belän) Säwdäne tuqtatqanda Törkiyä monı bik açıq itep belderde: İzrail fälästinlelärne üterüne häm Ğazzä xalqına azıq-tölek, toraq, darular häm su kebek töp humanitar ixtıyaclarnı alunı totqarlawın tuqtatırğa tiyeş. Ägär bolar ütälsä, bez ğadäti tormışqa qayta alabız, bernindi problema da yuq. Bez ike däwlätle çişeleşkä ireşergä telibez", - dip äytte.
İzrail säyäsätçeläreneñ Törkiyäne kiläçäktäge potenśial strategik yanaw bularaq kürüläre turındağı sorawğa da Fidan, Ğazzä, Yordannıñ könbatış üzänlege, Süriyä häm Livanğa iğtibarnı yünältep, "İzrail êçke säyäsätendä, qızğanıç, regional ambiśiyälären tormışqa aşıru öçen daimi bularaq säyäsät alıp baru maqsatınnan çığıp doşmanğa ihtiyaç toya. Fäqät härkem şunı belä: İzrail, üz iminlegen urnaştırırğa tügel, ä kübräk cir alırğa omtıla”, - dip cawap birde.
Fidan xalıqara cämäğätçelekneñ "İzrailneñ barı tik regional tärtipne genä tügel, global tärtipne dä tağın da kübräk totrıqsızlaştıruın totqarlawı” zarurlığına basım yasadı.
