İtaliyä xökümäte räise Djordjiya Meloni çärşämbe könne yasağan belderüendä İzrailneñ territoriyäsen kiñäytü plannarına häm qayber izraille räsmilärneñ köç qullanu belän bäyle belderülärenä qarşı Awrupanıñ çikläwçe çaraların yaqlarğa äzer buluın qabatladı.
“Bezneñ İzrailneñ urnaşu urınnarın kiñäytü plannarın gäyepläwebez häm qayber İzrail räsmiläreneñ köç qullanu belän bäyle belderülären qabul itelmäs dip sanawıbız mäğlüm. Şuña kürä bez alarğa qarşı Awrupanıñ ayırım çikläw çaraların yaqlarğa äzer,” – dip belderde Meloni, pänceşämbe könne bulaçaq Awrupa Şurası sammitı aldınnan Senatta çığış yasap.
Ul AQŞ ilbaşı Donald Tramp täqdim itkän häm Şarm äl-Şäyxta imzalanğan 20 punktlı plan turında “bik uñay häm konkret alğarış” dip bäyäläde.
“Bu möhim adımnıñ mömkin buluı öçen diplomatik tırışlıqlar kürsätkän barlıq aradaşçılarga tirän räxmätläremne belderäm: min Mısır, Qatar häm Törkiyä xökümätlärenä, ämma bigräk tä, AQŞ ilbaşı Donald Trampqa işarä itäm, çönki ul bu uñışqa ireşü öçen ğadättän tış ênergiyä sarıf itte,” – dip assızıqladı Meloni.
Ğazzägä yärdäm
Meloni Yaqın Könçığışta daimi tınıçlıq öçen “ışanıçlı mömkinlek” bar dip sanasa da, bu xälneñ äle dä “ualuçan” buluı turında kisätte.
“Xamas”nıñ utnı tuqtatu kileşüen bozuı” turında söyläp, Meloni İtaliyäneñ İzrailneñ cawap çaraların xuplamawın, ämma “Xamas”nıñ waqıtlı idarä itüdä yäisä kiläçäktäge Fälästin däwläte idaräsendä urın alırğa tiyeş tügellegen assızıqladı. Bu şartlarnı ul İtaliyäneñ Fälästin däwläten tanıuı öçen “kiräk şartlar” dip atadı.
Ul, İtaliyäneñ “Ğazzä öçen azıq-tölek” humanitar operatsiyäse qısalarında 2,000 tonnadan artıq on häm 200 tonnadan artıq başqa yärdäm cibärüen iskä töşerep, yärdämne däwam itäçägen ışandırdı.
Meloni Fälästin Milli İdaräsenä kiräkle yärdäm kürsätergä, şul isäptän anıñ citäkçelek äğzaların öyrätügä, äzer buluın da belderde.
“Bez yıllar buyı İyerixonda bulğan karabinerilärebezneñ Fälästin politsiyäsen öyrätügä öleş kertülärenä, şulay uq, Rafaxtağı Awrupa Berlege missiyäsendä qatnaşuçı sanın arttırırğa äzer. Min monı ilbaşı Abbasqa şäxsän citkeräçäkmen, noyabr başında Rimda oçraşırğa kileştek,” – dip östäde ul.
