Törkiyä Xälebtä yañadan başlanğan bombalaw häm snayper höcümnärendä tınıç xalıqtan kim digändä biş keşeneñ ülüe häm distälägän keşeneñ yaralanuınnan soñ, Süriyädä milli berdämlekkä öndäp, “YPG” terror oyışmasın yöklämälären ütärgä çaqırdı.
Atnakiçen (pänceşämbe könne) Änkarada Oman tışqı êşlär ministrı Bädr bin Hamäd äl-Busaidi belän oyıştırğan urtaq matbuğat oçraşuında çığış yasawçı Tışqı êşlär ministrı Xaqan Fidan Süriyäneñ kritik noqtağa citüen äytte.
Fidan, Süriyäneñ milli berdämlek şart bulğan noqtağa citüen belderep, “YPG”neñ cawaplılıqnı üz östenä aluınıñ zarurlığına basım yasadı häm kiyerenkeleklär artqanda terror oyışmasın İzrail mänfäğätlärenä xezmät itüdä gäyepläde.
“YPG” – “PKK” terror oyışmasınıñ Süriyädäge däwamı bularaq belenä.
Fidan: “Xäzer milli berdämlek waqıtı. “SDG” bu noqtada üz burıçın ütärgä tiyeş. Fäqät anıñ urınına İzrail belän koordinaśiyä êçendä, İzrailneñ töbägebezdä alıp barğan “bül häm xakimlek it” säyäsätenä qoral bulaçaq aktyorğa äylänüe dä, qızğanıç, oçraqlı tügel”, - dip iskärtep uzdı.
Fidan Süriyäneñ tönyağındağı Xäleb şähärendäge soñğı xällärneñ Törkiyäneñ soñğı ber yıl däwamında kisätkännäreneñ çağılışı buluın belderde.
Törkiyä Tışqı êşlär ministrı Süriyädä “SDG” isemen qullanğan “PKK/YPG” terror oyışması waqıt belän uynaw urınına Süriyädä integraśiyä barışın tormışqa aşıra başlağan bulsa ide bu waqiğalar barlıqqa kilmäs ide, dip iskärtte.
“YPG”neñ tınıç xalıqqa qarşı höcümnäreneñ artuı
Süriyä däwlät mediası “PKK/YPG” terror oyışmasınıñ atnakiçen öçençe kön rättän Xälebtäge toraq urınnarın bombalawın häm Süriyä ğaskäreneñ dä bu utqa cawap birüen belderde.
Süriyä sälamätlek saqlaw ministrlığına kürä, höcümnär Şäyex Maqsud kebek töbäklärdä artilleriya häm snayper utı belän başqarıldı. Höcümnärdä tınıç xalıqtan biş keşe ülgän häm Süriyäle ber ğaskäri belän bergä 33 keşe yaralanğan. Ut astında qalğan mäxällälärdä yäşäwçe yözlägän keşe qaçıp kitärgä mäcbür bulğan.
Bäreleşlär Süriyä İlbaşı idaräseneñ 2025nçe yılnıñ 10nçı mart könne oyışmanı däwlät oyışmalarına integraśiyäläw häm Süriyäneñ cir bötenlegen saqlaw häm härtörle büleneşne kire qağu tırışlığı qısalarında iğlan itkän kileşügä qaramastan yäşänä.
Süriyä räsmiläre oyışmanıñ ul waqıttan birle kileşüne tormışqa aşıru öçen anıq adımnarnı yasamawın äytä.
Xökümätneñ terrorçılıqqa qarşı köräş operaśiyäläre
Dimäşq Bäşar Äsädneñ 24 yıllıq xakimiyäteneñ 2024nçe yılnıñ 8nçe dekabr könne bärep töşerelüennän soñ il külämendä iminlek operaśiyälären arttırdı.
Törkiyä Xälebtäge xäzerge operaśiyäneñ barı tik Süriyä armiyası tarafınnan alıp barıluın, fäqät waqiğalarnı yaqınnan küzätep toruın belderde.
Törkiyä Milli saqlanu ministrlığı süzçese: "Süriyäneñ qurqınıçsızlığı – bezneñ iminlegebez”, - dip äytte.
Ministrlıq belderüendä: "İlebez Süriyäneñ berdämlek häm cir bötenlege nigezendä terror oyışmalarına qarşı köräşen yaqlıy. Bu qısada Süriyä yärdäm sorağan oçraqta Törkiyä kiräkle bulışlığın täêmin itäçäk", - dip äytelde.
