AQŞ ilbaşı Donald Tramp Kanada belän barlıq säwdä söyläşülären tuqtatuın belderde, häm Kanadanı êlekke däwlät başlığı Ronald Reygannıñ süzlären yalğış räweştä reklama kampaniyasendä qullanuda ğayepläde.
Trump üzeneñ “Truth Social” çeltärendä pänceşämbe könne "Alarnıñ mondıy naçar qılanışları arqasında, KANADA BELÄN BARLIK SÄWDÄ SÖYLÄŞÜLÄRE MONNAN SOÑ TUQTATILA" dip belderde.
Monnan tış ul: "Ronald Reygan waqıfı Kanadanıñ Ronald Reygannıñ ariflar turında tiskäre söyläwe xaqında yalğan reklama qullanuın citkerde,”-dide.
Tönyaq Amerikadağı kürşelär arasında mönäsäbätlärneñ axırğı ğäcäyep borılışı Kanada xökümät räise Mark Karninıñ, Aq Yortta Tramp belän oçraşıp, AQŞnıñ tarifların yomşartuın sorawınnan soñ ike atna uzğaç buldı.
Ronald Reygan waqıfı “X” çeltärendä beldergänçä, Ontario töbäge xökümäte Reygannıñ 1987nçe yılnıñ aprelendä millätkä säwdä turında möräcäğätendäge "saylap alınğan audio häm video" öleşlären qullanğan.
Waqıf reklamanıñ Cömhüriyät partiyäse äğzası bulğan êlekke säyäsätçeneñ çığışında yañğırağannarnı "yalğış mäğnädä qullanuın" äytte häm bu mäsälädä "xokukıy çaralar qaraluın" belderde.
Kötelmägän borılış
Tramp reklamanıñ AQŞ Yuğarı mäxkämäseneñ global tariflar turındağı qararına täêsir yasaw öçen êşlänüen äytte.
Säwdä söyläşülären tuqtatu turındağı kötelmägän qarar Karni öçen zur yuğaltu bulır, çönki Tramp anıñ belän 7 oktyabrdä oçraşqanda "dönyaküläm däräcädäge lider" dip bäyäläde häm Kanadanıñ "söyläşülärdän bik qänäğät" bulaçağın äytte.
Şulay da, ul waqıtta Tramp salım tariflarında bernindi taşlama täqdim itmäde.
Tönyaq Amerika säwdä kileşüe (USMCA) nigezendä, AQŞ häm Kanada arasındağı säwdäneñ yaqınça 85 protsentı tariflardan azat bulıp qala.
Läkin Trampnıñ global salım tarifları — bigräk tä qorıç, alyuminiy häm avtomobil' tarmaqlarında — Kanadaga zur täêsir yasadı, êş urınnarın yuğaltuğa häm êşmäkärlärneñ qıyınlıq kiçerüenä säbäpçe buldı.
