Qıtay pänceşämbe könne xalıqara cämäğatçelekne Ğazzädäge gumanitar krizisnı ciñeläytü öçen BMO Xalıqara mäxkämäse kürsätkän yuldan barırğa çaqırdı.
Qıtay tışqı êşlär ministrlığı süzçese Pekinda jurnalistlarğa belderü yasap, BMO Xalıqara mäxkämäse qaraşınıñ İzrail yawı astındağı Fälästin xalqına yärdäm citkerü öçen Berlӓşkӓn Millӓtlӓr Oyışması häm qalğan oyışmalar belän xezmättäşlek başqaru cawaplılığın ap-açıq kürsätüen äytte.
Süzçe: “Xalıqara cämäğatçelek BMO Xalıqara mäxkämäse kürsätkän yuldan barır, Fälästin xalqı oçraşqan gumanitar krizisnı ciñeläyter häm Fälästin mäs’äläseneñ ğadel häm däimi bularaq çişeleşe öçen bertuqtawsız êşçänlek başqarır dip ömetlänäm,” – dide.
Qıtaynıñ bu belderüläre dönya mäxkämäse çärşämbe könne qabul itkän qararda İzrailneñ Jeneva kileşüe buyınça öçençe däwlätlär häm ayıruça Xalıqara Qızıl Xaç komitetı häm BMOnıñ fälästinle qaçaqlarğa yärdäm kürsätü agentlığın da kertep tarafsız gumanitar yärdäm kürsätüçe törkemnär tarafınnan täêmin itelgän yärdäm programmaların qabul itü häm qulaylaştıru belän cawaplı buluın citkerüennän soñ yasaldı.
“Xalıqara xoquq belän bäyle mäs’älälärdä konstruktiv rol uynarğa däwam itäçäkbez häm xalıqara ğadellek häm döreslek yaqlı bulıp, xoquq öçen tögäl adımnar yasayaçaqbız,” – dide süzçe.
Süzçe Qıtaynıñ Fälästin mäs’äläsenä qarata totışınıñ täwäkkäl häm tögäl buluın assızıqlap, härwaqıt ğadellek häm döreslek yaqlı buluların häm Fälästin xalqı xaqların xuplawların belderde.
