İndoneziyaneñ könçığışındağı Flores utrawı sularında 7,7 ball zurlığında köçle cir teträw buldı; räsmi zatlar śunami turında kisätkännän soñ meñlägän keşe panikağa birelep, qaça başladı. Kim digändä 20 keşeneñ ülüe raslandı.
Şimbä könge cir teträwneñ êpiśentrına iñ yaqın urın bulğan Nagekeo rayonında yäşäwçelär, yaqınlaşuçı śunaminıñ bilgese bularaq qabul itelgän diñgezneñ çigenüe belän biyegräk urınnarğa qaça başladı.
Kisätü soñraq beterelde.
AQŞ häm İndoneziya räsmiläre say cir teträwneñ êpiśentrı utrawnıñ tönyaq yar buylarındağı sularda, Ende şähärenä yaqınça 68 çaqrım yıraqlıqta buluın belderde.
Berençe zilzilädän soñ şul uq töbäktä 6,1 ballık köçle iyärçen cirteträw buldı.
31 yäşlek xastaxanä xezmätkäre häm Maumereda yäşäwçe Lukas Lotar “AFP” agentlığına bolay dip belderde: “Kinät kenä selkenä başladım häm panikağa bireldem. Xastalar da xastaxanädän qaçtı, zilzilä köçle ide. Qayber diwarlarnıñ yarılğanın kürdem.”
Nagekeoda yäşäwçe 56 yäşlek Yohanes Babo, cir tetri başlağanda bazarda buluın söyläde.
Ul “AFP”ğa: “Cirteträw bik köçle ide. Bez bolay da öydä tügel idek. Keşelär panikada ide, törle urınnarğa qaçtılar. Xäzergä biyek cirlärgä menärgä tırışabız. Ğailäm imin urında. Berkem dä zıyan kürmäde,” - dide.
Êvakuaśiya çaqıruı
İndoneziyaneñ Meteorologiya, klimatologiya häm geofizika agentlığı cir teträwdän soñ śunami dulqınnarı qurqınıçı turında kisätep, xalıqqa biyegräk urınnarğa menärgä quştı.
Milli Afät belän idarä itü agentlığı wäkile Abdul Muhari: “Floresnıñ tönyaq yarında häm könyaqtağı urınnarda, könyaqtağı utrawlarda häm könyaqta yäşäwçelärdän tiz arada töbäktän kitüne sorıybız,” - dide.
