Nepalnıñ Qıtay çigendäge köçle su basulardan soñ, kım digändä, 734 keşe hälaq bulğan häm 2498 keşe yuğalğan. Nepalnıñ afätlär belän idarä itü agentlığı biş kön däwamında êzläw-qotqaru operatsiyäläre tuqtamawın citkerde.

Qıtay däwlät mäğlümat çaraları isä çärşämbe könne Tibetta bulğan afättän soñ 16 keşe ülüen häm 546 keşe yuğaluın raslağan ide.

Şulay itep, ülüçelärneñ ğomumi sanı 750gä citte, ä yuğaluçılar 3044 buldı.

Şimbä kiçendä çıqqan soñğı mäğlümatlarda Nepalda yuğalğan keşelär sanı 2426dan 2498gä qadär artqan.

Yuğalğannar arasında 589 çit il keşese bar. Êlegräk 517 çit il keşese belän êlemtä özelgän ide.

Afätlär qurqınıçın kimetü häm idarä itü buyınça milli organ mäğlümatlarına qarağanda, yuğalğannar isemlegendä, şulay uq, su basulardan zıyan kürgän yılğalar buyındağı gidroêlektrostantsiyälärdä êşläwçe 933 êşçe dä bar.

Tabiğat afätläre belän idarä itü agentlığı xäbär itkänçä, xäzerge waqıtqa qadär barlığı 8186 keşe qotqarılğan, şul isäptän, 227 çit il keşese.

Hindstan xakimiyätläre Nepaldan ağıp kilüçe yılğalarda su basu qorbannarı dip farazlanuçı cide keşeneñ mäyete tabıluın citkerde. Läkin bu keşelär ğomumi ülüçelär sanına kertelmägän.