Törkiyä tışqı êşlär ministrı Xaqan Fidan comğa könne AQŞnıñ Mayami şähärendä Ğazzä temalı cıyılışta qatnaşa.
Tışqı êşlär ministrlığınnan yasalğan belderüdä: “Ministrıbız 19 nçı dekabr’dä Mayamida AQŞ, Misır häm Qatar räsmi wäkilläre qatnaşında Ğazzä temalı cıyılışta qatnaşaçaq. Oçraşu barışında başqa töbäk mäs’älälärenä bağışlanğan söyläşülär uzdırılaçaq”, — diyelde.
Êlegräk Aq Yort räsmiye “Anadolu” agentlığına maxsus wäkil Stiv Vitkoffnıñ Ğazzädäge utnı tuqtatu kileşüeneñ kiläse êtabı turında söyläşü öçen Törkiyä, Katar häm Misır wäkilläre belän oçraşaçağın beldergän ide.
Bu cıyılış İzrail belän “Xamas” arasında utnı tuqtatu kileşüe ğamälgä kergännän soñ yaqınça ike ay uzğaç ütkärelä. Kileşüneñ berençe êtabı bäreleşlärne tuqtatunı, İzrail köçläreneñ öleşçä çığarıluın, totıq–äsir almaşunı häm Fälästin toraq punktlarına gumanitar yärdämne tulısınça kertüne üz êçenä ala ide.
AQŞ ilbaşı Donal’d Trampnıñ 20 maddädän torğan planınıñ ikençe êtabında xalıqara totrıqlılıq köçlären urnaştıru, “Xamas”nı qoralsızlandıru, İzrailneñ töbäktän tulısınça çigenüe häm Ğazzäne waqıtlıça idarä itäçäk “texnokrat” Fälästin komitetı tözü küzdä totıla.
Fälästinlelär İzrailne 2023 yılnıñ oktyabrennän birle däwam itkän, küpçelege xatın-qızlar häm balalar bulğan 70 meñnän artıq keşeneñ ülemenä häm 170 meñnän artıq keşeneñ yaralanuına kitergän ike yıllıq suğışnı betergän utnı tuqtatu kileşüen qat-qat bozuda ğäyeplilär.
Ğazzä sälamätlek saqlaw räsmiläre mäğ’lümatına qarağanda, utnı tuqtatu köçenä kergännän birle İzrail höcümnärendä kim digändä 395 fälästinle hälaq bulğan, 1 088 keşe yaralanğan.
