Könçığış Yavada öylä namazı waqıtında cimerelgännän internat-mäktäp qaldıqlarında qotqaru törkemnäre haman da êşçänleklären däwam itterä.
Räsmi zatlar pänceşämbe könne İndoneziyadä cimerelgän mäktäptä yuğalğan 59 keşedän tormış signalı ala almawların citkerde.
Yava utrawındağı küp qatlı mäktäpneñ ber öleşe düşämbe könne uquçılar namazğa cıyılğan waqıtta cimerelgän. Berniçä kön däwam itkän êşçänleklärdän soñ kim digändä 5 keşeneñ ülüe döres dip belderelde. Xäräbälär astında haman da 59 keşeneñ buluı farazlana.
Çärşämbe tönlä qotqaru operaŝiyaläre direktorı Yudhi Bramantyo ülüçelär sanınıñ 6ğa citüen äytep, ilneñ afät belän idarä itü agentlığı pänceşämbe könne bu sannıñ haman da 5 buluın açıqladı.
Afat belän idarä itü agentlığı başlığı Suharyonto: “Termal dron kebek yuğarı texnologiyale êşlänmä qullandıq, inde tormış signalları yuq,” – dide.
Başqala Djakartanıñ yaqınça 770 çaqrım könçığışındağı Könçığış Yavada urnaşqan Sidoardjo rayonındağı Al Khoziny mäktäbe däwam itkän tözeleşne kütärä almağan fundament arqasında cimerelde.
Qayğılı ğailälär cimereklär yanınnan kitmi.
“AFP” xäbär agentlığı beldergänçä mäktäp yanında yäşäwçelär ğailälärne üzlärenä çaqırdı.
“Berençe könnän ük kötäm. Yaxşı xäbär kötäm, haman da qardäşemneñ isän buluına ömetem bar,” – 17 yäşlek bertuğanı yuğalğan Maulana Bayu Rizky Pratama.
Qotqaruçılar çärşämbe könne xäräbälärdän 5 keşe isän-imin çığardı. Şul waqıtta çarasız qalğan ata-analar balalarının tabıluı öçen êzläw êşçänlekläreneñ tizlätelüen taläp itte.
14 yäşlek ulı yuğalğan Abdul Hanan: “Xaräbälär astındağı balalar yärdämgä çaqıra ide. Qotqaru operaŝiyase tiz bulırğa tiyeş,” – dide.
Milli êzläw häm qotqaru agentlığı başlığı Möxämmäd Syafii qorbannar bulğan urınğa ireşü öçen cir astınnan tunnel qazu zarurlığın citkerde.
Läkin qazularnıñ cimereklärgä täêsir itü riskı bar.
Termal dronnar isän qaluçılarnı häm mäyetlärne tabu öçen qullanıla. Läkin isän qalu şansı öçen 72 sägät tularğa tora.
Ğailälär pänceşämbe könne awır texnika qullanırğa röxsät birde. Ber qotqaru räsmi zatı “AFP”ğa operaŝiyaneñ 7 könnän artıq baraçağın äytte.
Cirle xalıqtan Ani äytüençä mäktäpneñ cimerelüe mäxällädä zilzilälärgä kiterde. “Çayqalu sizdem, annarı tawış işettem. Şunduq çaptım,” – dide.
Qotqaru operaŝiyase sişämbe tönlä barlıqqa kilgän cirteträw arqasında tuqtalıp tordı. Cirle yärdäm kürsätü oyışmaları cimereklär yanında ğailälärgä azıq-tölek häm su taratu urının qordı.
Mäktäpneñ dürtençe qatın tözegändä ike qatlı mäktäp fundamentı cimerelgän. İndoneziyadä tözeleş standartlarınıñ zäğıyf buluı, öylärneñ tözelep betmiçä qaluı häm byudjet bulğanda östämä qat tözü yış küzätelä.
