Ärdoğan şimbä könne Baqıda yasağan çığışında Törkiyäneñ Azärbaycan belän Ärmänstan arasında daimi tınıçlıqqa ireşü  çaqıruın häm bu yünäleştäge yaqlawın yañarttı.

Törkiyä ilbaşı Azärbaycannıñ Qarabaxtağı ciñüeneñ 5 yıllığı bilgeläp ütelgän tantanada yasağan çığışında 30 yıllıq Ärmänstan basıp aluınıñ tämamlanuın maqtap, monı Kavkaz öçen borılış noqtası dip bäyäläde.

Ärdoğan azat itelüneñ barı tik zur ğadelsezlekkä noqta quyu belän genä çiklänmäwen, ä töbäktäge totrıqlılıq öçen yaña däwer başlatuın äytep, barlıq yaqlarnı ciñüne daimi tınıçlıqqa äwerelderergä çaqırdı.

“Bez açu saqlamıybız häm ütkändäge qayğı-ğazaplarnıñ qabatlanuına yul quymıybız”,- dide Ärdoğan. Ul suğıştan soñğı çornı Kavkazda daimi tınıçlıqqa iltkän yulnıñ möhim ber basqıçı buluın assızıqladı.

Xezmättäşlekne nığıtu

İlbaşı Ärdoğan, Azärbaycan ilbaşı İlham Äliyevneñ Ärmänstan belän tınıçlıq kileşüenä ireşü yünäleşendäge ixlas tırışlıqların maqtadı, Ärmänstan prem’yer-ministrı Nikol Paşinyannıñ konstruktiv adımnarın da yuğarı bäyäläde.

“İnşalla, bu danlı ciñü ike il liderınıñ konstruktiv totışı näticäsendä töbäktä tınıçlıq häm iminlek urnaştıraçaq daimi kileşü belän tämamlanaçaq,” – dide Ärdoğan häm Törkiyäneñ bu prośessnı törle yaqlap yaqlarğa äzer buluın citkerde.

Ärdoğan şulay uq Qarabax suğışında qatnaşqan Azärbaycan ğäskärilärenä häm gazıylarğa tirän xörmät belderde, alarnıñ köräşen batırlıq ürnäge dip atadı.

İlbaşı Ärdoğan Qarabax ciñüeneñ töbäktäge geopolitik balansnı üzgärtüen assızıqlap, Törkiyäneñ Azärbaycannıñ alğa baruına söyenüen belderde.

İke yaqlı mönäsäbätlärneñ könnän -kön üsüenä dä tuqtalğan ilbaşı Ärdoğan tabiği gaz ütkärgeçe liniyäläre häm transport koridorları kebek zur külämle ênergiya proyektlarınıñ ike il arasındağı xezmättäşlekne tağın da nığıtuına basım yasadı.