Qıtaynıñ räsmi xäbär agentlığı «Sinhua» düşämbe könne xäbär itkänçä, Qıtay ilbaşı Si Cinpiñ Könyaq Aziya ileneñ Cömhüriyät könen qotlap Hindstan däwlät başlığı Drupadi Murmunı täbrik itte. Si Cinpiñ üzeneñ qotlawında Qıtay belän Hindstannıñ yaxşı kürşelär, duslar häm partnyerlar buluın assızıqladı.

«Sinhua» xäbärenä kürä Si soñğı ber yılda Qıtay-Hindstan mönäsäbätläreneñ üseş aluın häm yaxşıruın belderde. Ul bu xezmättäşlekneñ dönya tınıçlığı häm mullığın saqlaw häm üsterü öçen zur ähämiyätkä iyä buluın äytte.

Si Cinpiñ härwaqıt yaxşı kürşelär, duslar häm partnyerlar bulıp qalunıñ Qıtay öçen dä, Hindstan öçen dä iñ döres yul ikänlegenä ışanuın citkerde.

«Sinhua» xäbärenä kürä Si Qıtay häm Hindstannı berga biyüçe acdaha häm fil dip tasvirladı. Ul ike yaqnıñ da alış-bireş häm xezmättäşlekne kiñäytüen, şulay uq ike yaqlı mäs’älälärne xäl itep, nıqlı häm totrıqlı mönäsäbätlärne alğa sörüen ömet itüen belderde.

Atom-töş qoralları bulğan bu ike Aziyale kürşe çikläre tögäl bilgelänmägän häm 1950nçe yıllardan birle bäxäsle bulğan 3800 çaqrım ozınlığındağı çikne büleşä.

İke il arasindağı mönäsäbätlär 2020nçe yılğı bäreleş belän qaqşıy; bu bäreleştä 20 Hindstan häm dürt Qıtay ğaskäriye hälak bula. Annan soñ Gimalay çigenä här ike yaq ta küp sanda xärbi köçlären tuplıy.

Uzğan yılnı çınğa aşqan ber törkem yuğarı däräcäle ike yaqlı säfärlärdän soñ här ike il mönäsäbätlärne yaxşırta başladı.

AQŞ ilbaşı Donald Trampnıñ agressiv tışqı säyäsäte külägäsendä ike il säwdä häm investiśiya ağımın arttırdı, ä turıdan-turı oçqıç säfärläre 2025nçe yılda yañadan başladı.