Änkara citäkçelege Sudanda däwam itüçe bäreleşlärgä tınıç maqsatlı çişeleş tabu tırışlıqlarına kürsätkän xuplawnı qabatladı.
Törkiyä düşämbe könne Sudandağı ber BMO bazasına oyıştırılğan häm 6 Bangladeşlı ğaskärineñ ülemenä, 8 keşeneñ dä yaralanuına kitergän keşesez hawa apparatı höcümen ğayepläde.
Törkiyä tışqı êşlär ministrlığı tarafınnan yasalğan belderüdä bolay diyelde: “Bu çirqanıç höcümdä ğomeren yuğaltqan Bangladeşlı tınıçlıq köçle ğaskärilärenä Allaxı Täğalädän yarlıqaw, yaralanuçılarğa şifalar telibez.”
Ministrlık Sudannıñ berdämlek häm cir bötenlegen saqlawnıñ ähämiyäten assızıqlap, ildä däwam itüçe bäreleşlärgä tınıç maqsatlı çişeleş tabu tırışlıqların xuplawların qabatladı.
Höcüm Sudan armiyase belän Operativ yärdäm köçläre arasında bäreleş özleksez barğan çorda çınğa aştı. 2023 yılnıñ aprelennän birle däwam itüçe bäreleşlärdä meñlägän keşe ülde, millionlağan keşe yortsız qaldı häm dönyanıñ iñ naçar gumanitar krizislarınnan berse çıqtı.
Sudan armiyase höcümdä Operativ yärdäm köçlären ğayepläde. Ğıysyançı törkem isä belderü yasamadı.
Ğomere özelgän ğaskärilär BMOnıñ Abyeydağı waqıtlıça iminlek köçlärenä qarıy ide. Bu köçlär Sudan belän Könyaq Sudan citäkläwçe bäxäsle häm neftkä bay çik buyı töbägendä wazıyfa başqara.
