Törkiä Cömhüriäte Transport häm asqorıma ministrı Abdülkadir Uraloğlu, İran yaqınnarında kötep toruçı häm xucası törek bulğan ber köymäneñ, Tähran citäkçelegennän röxsät alınğannan soñ Ormuz buğazı aşa uzarğa yul quyıluın äytte.
Ministr Uraloğlu, pänceşämbe könne matbuğatqa yasağan häm comğa könne basılıp çıqqan belderülärendä, Änkaranıñ Ormuz buğazı öçen iñ yuğarı däräcädäge iminlek söränen saluın belderde. Şulay uq ul töbäktä qalğan häm iyäläre törek bulğan 14 köymäneñ wazğıyäte belän bäyle bularaq İran räsmiläre belän êlemtädä toruların äytte.
Uraloğlu: "Ormüz buğazında 15 köymäbez bar ide, bersen İran portın qullanğanı öçen İran citäkçelegennän röxsät alıp ütkärdek. İran yağı belän êlemtädä torırğa tırışabız. 14 köymäbez kötä, xäzerge waqıtta bernindi problemaları yuq," — dide.
Ministrlık, buğazdan ütkän köymäneñ iseme “Rozana” ikänen açıqladı. Belderüdä törek şirkätlärenä qarağan köymälärdä barlığı 171 personal buluı äytelde.
Amerika Quşma Ştatları häm İzrail İranğa qarşı alıp barğan suğış İrannıñ Ormuz buğazın yabuı arqasında tankerlarnıñ häm başqa köymälärneñ tuqtap qaluına kiterde. Bu xäl dönyaküläm ênergiä täêminatı mäs'äläsendä borçularnı arttırdı.
Törkiäneñ Transport häm asqorıma ministrlığı şulay uq, “Törek Hawa Yulları” häm “Ajet” şirkätläreneñ Ğiraq, Süriä, Livan, Ürdün, Doxa, Dubai, Äbu-Dabi, Küväyt, Bäxräyn häm Dammamğa bulğan reysların 19nçı martka qädär, İranğa bulğan reysların isä 20nçe martqa qädär tuqtatuın belderde.
“Pegasus” aviakompaniyaseneñ Küväyt, Bäxräyn, Doxa, Amman, Bäyrut, Ğiraq, Dubai, Äbu-Dabi häm Şarcägä reysların 23nçe martka qädär, İranğa reysların isä 28nçe martqa qädär ğämäldän çığaruın citkerde.
Ministrlık “Törek hawa yulları” şirkäteneñ Omanğa östämä reyslar oyıştıruın açıqladı. 28nçe fevral'dä başlanğan suğıştan birle 76 oçışnıñ Törkiägä yünältelüe dä xäbär itelde.
