İran Amerika Quşma Ştatları  ilbaşı Donal'd Tramp Yaqın Könçığıştağı suğışnı  tuqtatuğa yünältelgän täqdimne kire qaqsa da Ormuz buğazın navigaśiya öçen açu şartlarınnan çigenmi.

İran däwlät televideniyese IRIB xäbär itüençä, tışqı êşlär ministrı Abbas Arakçi Tähran citäkçelegeneñ taläplärennän çigenmäyäçägen äytte.

Arakçi şartlar arasında töbäktäge bäreleşlärne tuqtatu häm berniçä ay êlek bozılğan utnı tuqtatu kileşüe qısalarındağı yöklämälärne ütäwneñ dä buluın belderde.

Arakçi: “Bezneñ şartlar açıq häm Ormuz buğazın yañadan açuğa yünältelgän  här adım bu şartlarnıñ ütälüenä bäyle. Bez berqayçan da diplomatiyä yäisä söyläşülär  işegen yapmadıq, läkin şul uq waqıtta xoquqlarıbızdan da waz kiçmädek”, — dide.

İrannıñ Qatar arqılı Vaşingtonğa citkergän täqdime, şartlar qabul itelgän oçraqta, buğaznı 7 kön eçendä yañadan xäräkät öçen açunı küzdä tota.

Tährannıñ taläpläre arasında Livandağı bäreleşlärne häm Yämändäge doşmanlıq ğamällären tuqtatu, tuñdırılğan İran aktivların irekle qaldırı, İran neftenä qarata sankśiyälärne beterü häm AQŞnıñ diñgez blokadasın beterü bar.

AQŞ ilbaşı Donal'd Tramp isä şimbä könne yasağan belderüendä kileşügä açıq buluın, läkin utnı tuqtatu täqdimen kire qağuın beldergän ide.