Ukraina ilbaşı Volodimir Zelenskiy Rusiyäneñ üz ilenä höcüm itüenä xalıqara cawapnıñ citärlek bulmawın belderde.

Zelenskiy sośial çeltärlärdäge yullamasında Ukrainanıñ törle töbäklärenä Rusiyäneñ höcümnäre turında mäğlümat birde.

Ul Kiyevta Rusiyäneñ “Şahed” dronnarı däres waqıtında universitetka höcüm itüen häm ul waqıtta 160 studentnıñ sıyınu urınında buluın äytte.

Zelenskiy şulay uq tönlä Odessağa höcüm oyıştırıluın, toraq binağa häm şähär asqormasına zıyan kilüen, berse bala bulğan 5 keşeneñ yaralanuın citkerde.

Ul Xersonda Rusiyä köçläreneñ qotqaru törkeme binasına häm poliśiya bülegenä höcüm itüen, Xarkov ölkäsendäge höcümnär arqasında meñlägän keşeneñ utsız qaluın häm cäräxätlänülärgä kiterüen xäbär itte.

Zelenskiy “Şahed” dronnarı häm hawa bombaları qurqınıçı arqasında ilneñ küp öleşlärendä höcüm turında kisätülär däwam itüen bilgeläp ütte häm xalıqara cämğıyätneñ höcümnärgä cawabın tänqıytläde.

Ukraina liderı: “Qızğanıç, dönya häm iñ yoğıntılı liderlarnıñ Rusiyä höcümnäreneñ köçäyüenä cawabı citärlek tügel,” - dide.

Zelenskiy Rusiyä häm İranda citeşterelgän “Şahed” dronnarı täwlek äylänäse höcümnär yasawın xäbär itte, monı Ukrainanıñ ğına probleması dip qabul itep bulmawın assızıqladı.

“Ukrainalılarğa qarşı här höcüm - çınlıqta Rusiyäneñ başqa illär häm xalıqlar öçen äzerlägän taktikasınıñ repetiśiyase. Xäzer ük êşkä kereşergä kiräk. Yawızlıq üzen kürsätkändä anı tuqtatırğa kiräk,” – dide ul.

Rusiyägä basım yasaw häm Ukrainağa yärdäm kürsätü öçen tögäl häm nıqlı adımnar kiräklegen assızıqlağan Volodimir Zelenskiy partnyerlarnıñ närsä êşlärgä kiräklegen belülären bilgeläp ütte.

Ukraina liderı ilenä hawa saqlanu sistemaları kiräklegen, Rusiyägä sankśiyalär kertelergä tiyeşlegen häm saqlanu sänägäte citeşterüen sizelerlek arttıru zarurlığın belderde.