Kreml, Rusiyä däwlät başlığı Vladimir Putin häm AQŞnıñ yuğarı däräcäle wäkile Stiv Vitkoff arasında Mäskäwdä uzğan häm "faydalı" dip bäyälängän söyläşülärdän soñ, AQŞ, Ukraina häm Rusiyäneñ Berläşkän Ğäräp Ämirleklärendä (BĞÄ) oçraşırğa kileşülären belderde.

Ukrainadağı suğışnı tuqtatuğa yünältelgän diplomatik tırışlıqlar soñğı aylarda tizläneş aldı, läkin Mäskäw belän Kiyev äle haman cirlär häm suğıştan soñğı tärtip mäs’älälärendä törle fikerlärdä qala birä.

Kreml mäğlümatlarına qaraganda, Stiv Vitkoff citäkçelegendäge AQŞ söyläşüçeläre comğa könneñ täwge säğatlärenä qadär däwam itkän oçraşu öçen Mäskäwdä Putin belän küreşte.

Kremlneñ diplomatik kiñäşçese Yuriy Uşakov jurnalistlarğa söyläşülärneñ "här yaqlap faydalı" buluın äytte.

Uşakov, Vitkoff häm AQŞ delegatsiyäseneñ söyläşülärne däwam itü öçen Abu-Dabiğa yul totuın belderde. Şulay uq, Rusiyä xärbi küzläw oyışması (GRU) direktorı İgor Kostyukov citäkçelegendäge Rusiyä delegatsiyäseneñ dä BĞÄgä baraçağın citkerde.

Uşakov: “İminlek mäs’älälärenä iğtibar itüçe öçyaqlı êş törkemeneñ berençe utırışın bügen Abu-Dabida ütkärü qararı qabul itelde,” – dide.

Söyläşülär turında tulıraq mäğlümat birelmäsä dä, Rusiyä häm Ukraina räsmi zatlarınıñ küzgä-küz küreşep söyläşäçäge älegä bilgele tügel. Uşakov: “Bez konfliktnı säyäsi häm diplomatik yullar belän çişü belän çınlap ta qızıqsınabız,” – dip äytte. Läkin: “Bu kileşü tämamlanğanğa qädär Rusiyä üzeneñ suğış qırındağı maqsatlarına ireşüen däwam itäçäk,” – dip östäde.

İkençe yaqtan, Ukraina däwlät başlığı Volodimir Zelenskiy pänceşämbe könne yasağan belderüendä kileşü proyektınıñ “ äzer diyärlek” buluın äytte. Ul üzeneñ belän AQŞ ilbaşı Donald Tramp arasında suğıştan soñğı iminlek garantiyäläre mäs’äläsendä kileşü buluın belderde.

BĞÄdäge bu êlemtälär, soñğı diplomatik xäräkät başlanğannan birle Vaşington, Kiyev häm Mäskäw räsmi zatları qatnaşındağı berençe räsmi raslanğan öçyaqlı söyläşü bulıp tora.