Xärbi çığanaq mäğlümatları buyınça, kim digändä, 58 Yämän xökümäte ğaskäriye “Xusilär”neñ raketa häm keşesez hawa apparatı höcümnärendä hälaq bulğan. Bu höcüm ildäge watandaşlar suğışında dürt yıl êçendä iñ qanqoyğıç könnärneñ berse buldı.
Köç qullanu kürşe Soğud Ğaräbstanına da ütep kerde.
İsemen belderergä telämäwçe çığanaq pänceşämbe könne höcümnärneñ Marib häm Xadramut töbäklärendäge xärbi pozitsiyälärgä yünältelüen häm tağın distälägän ğaskärine yaralawın belderde.
Xärbi wäqalätle bu höcümnärne 2022 yıldan birle xökümät köçlärenä qarşı iñ ülemle höcüm dip atadı.
“Xusilär”neñ xärbi wäkile Yaxya Seri höcümnärneñ xökümät pozitsiyälärenä yünältelgänen, monıñ Soğud Ğaräbstanı tarafınnan xuplanğan xärbi köç tuplawğa cawap buluın äytte.
Yämän Saqlanu ministrlığı qorallı köçlärneñ "tiyeşle waqıtta häm urında" cawap biräçägen belderde.
Soğud Ğaräbstanı citäkçeleğendäge koalitsiya mäğlümatları buyınça, “Xusilär”neñ pänceşämbe könge höcümnäre çiktän tış kiyerenkelekne arttırdı, Soğud Ğaräbstanınıñ Najran töbägendä 11 tınıç keşene yaraladı.
