Ğazzä sälamätlek saqlaw ministrlığı yäkşämbe könne, İzrail belän ireşelgän utnı tuqtatuğa qaramastan, töbäktäge gumanitar häm mediśina wäzğıyäteneñ haman da fäcigale däräcädä buluın äytte häm İzrail wäqalätleläreneñ kileşü qısasındağı töp yöklämälären ütämäwen belderde.
Ministrlıq süzçese Xälil äl-Dakran, İzrailneñ daru häm mediśina kiräk - yaraqları kertüne kirtäläwen däwam itüen, şulay uq çit illärdä däwalanuğa ixtıyacı bulğan meñlägän yaralı fälästinleneñ çığarıluın totqarlawın äytte.

Ministrlıq mäğ’lümatına qarağanda, 16 meñ 500 awıru häm yaralığa kiräkle dokumentları äzer buluına qaramastan, Ğazzädän çığu röxsäte birelmägän.

Äl-Dakran, köçle yawım-töşem häm qatı cil arqasında çatırlar yırtıluın, waqıtlıça mediśina üzäkläreneñ xezmät kürsätä almawın häm bu xälneñ sälamätlek yärdäme êzlägän tınıç xalıq öçen şartlarnı tağın da awırlaştıruın citkerde.
Süzçe xalıqara cämäğat’çelekne su basqan lager’larda yäşäwçe ğailälärgä yärdäm maqsatınnan çatırlar, küçmä öylär häm tözeleş materialları kertügä röxsät birü öçen êşkä kereşergä çaqırdı.

Comğa könennän birle Ğazzädä salqın hawa, köçle yawım-töşemnär häm qatı cil küzätelä, çatırlar su belän tulğan.

2023 yılnıñ oktyabr’ ayınnan birle barğan suğış näticäsendä yaqınça 69 meñ 200 keşeneñ ğomere özelgän, 170 meñ 700dän artıq keşe yaralanğan.

Bügen isä yaqınça 2,4 million fälästinle awır gumanitar şartlarda yäşäwen däwam itä.

İzrailneñ höcüme 10 oktyabr’dä ğamälgä kergän utnı tuqtatu belän tämamlandı.