Awrupa Berlege saqlanu häm ğaläm komissarı Andrius Kubilius AQŞnıñ Farsı qultığı illärenä häm Ukrainağa üzlären saqlar öçen citärlek külämdä raketalar belän täêmin itä alır xäldä bulmawın belderde.
Comğa könne yasağan açıqlawında Kubilius: "İran krizisınnan soñ, anı şulay dip atasaq, Awrupada hawa saqlanu häm raketa saqlanu sistemaların citeşterüne arttırunıñ bezneñ öçen tağın da ğadättän tış kiräkle xälgä kilüe bik açıq. Çönki amerikalılar Farıs qultığı illäre, Amerika armiyäse häm Ukrainanıñ ixtıyacları öçen, çın mäğnäsendä, bu raketalardan citärlek qädär täêmin itä almayaçaqlar," - dip belderde.
Kubilius Awrupanıñ raketa saqlanuın üsterüdä "zur awırlıq" belän oçraşuın assızıqladı.
Bu kisätü Ukrainanıñ däwam itüçe Rusiyä raketa höcümnäre belän oçraşuı häm Farsı qultığı illäreneñ strategik infrastrukturalarına qarşı qabatlanğan İran höcümnärennän soñ yuğarı xäwef xälenä kergän waqıtta yasaldı.
AQŞta raketa qıtlığı
AQŞtağı raketa qıtlığı borçılunı tağın da arttırdı. AQŞ-İzrailneñ İranğa qarşı däwam itüçe höcüme waqıtında, "Tomahawk" cir öste höcüm raketaları häm "SM-3" raketaların da kertep, töp qorallarda qıtlıq belän oçraşuları xäbär itelä.
AQŞnıñ yuqarı däräcäle wäkile Vaşingtonnıñ kiläse 24 säğat êçendä höcümnärdä "zur artu" kötüen, şul uq waqıtta, raketa rezervlarınıñ betep baruın belderde.
Pentagon, şulay uq, "Patriot" raketalarınıñ sanı çiklänüen belderä, çönki Ukraina hawa saqlanu sistemaları Rusiyä belän dürt yıllıq suğış däwamında anıñ zur öleşen qullanıp beterde.
