Rusiya tışqı êşlär ministrı urınbasarı Sergey Ryabkov Rusiya däwlät başlığı Vladimir Putin belän AQŞ ilbaşı Donal’d Tramp arasında oçraşu ütkärü öçen kiräkle şartlarnıñ älegä barlıqqa kilmäwen belderde.

Ryabkov çärşämbe könne Mäskäwdä Däwlät Dumasında uzğan cıyılışta:
“Yuğarı däräcäle oçraşu tirän äzerlek häm barlıq yünäleşlärne centekläp bäyäläwne taläp itä. Bügenge köndä bu oçraşunı ütkärü öçen kiräk bulğan berençe şart ta, ikençe şart ta ütälmägän”,- dide.

Rusiya diplomatı äytüençä, Rusiya tışqı êşlär ministrlığı häm AQŞ däwlät departamentı äzerlek êşlärendä qatnaşa, läkin xäzerge waqıttağı töp mäs’älä -  liderlar avgust urtalarında kileşkän qısanı konkretlaştıru.

Ryabkov yuğarı däräcäle êlemtälär bulmasa da, yaqlarnıñ  daimi bäyläneştä toruın häm iminlek mäs’äläläreneñ iñ möhim kön tärtibe maddäse buluın assızıqladı.

Tramp belän Putin soñğı tapqır 15 avgustta Alyaskada oçraştılar häm annan soñ Budapeştta tağın ber söyläşü ütkärü turında kileştelär. Ämma bu oçraşu tormışqa aşmadı.

Kreml’ êlegräk sammit öçen zur äzerlek kiräklegen häm barı tir oçraşır öçen genä anı ütkärep bulmawın beldergän ide.