Törkiyä tışqı êşlär ministrlığı çığanaqlarına qarağanda, İran tışqı êşlär ministrı Abbas Arakçi comğa könne Törkiyägä säfär qılıp wazıyfadaşı Xakan Fidan belän oçraşaçaq.

İke kürşe däwlät iminlek, säwdä häm töbäk krizisları buyınça xezmättäşlekne tiränäytergä niyätli.

Törkiyä tışqı êşlär ministrınıñ Änkaranıñ İran­dağı soñğı waqıyğalarnı yaqınnan küzätep baruın häm İran­nıñ iminlege, tınıçlığı häm totrıqlılığınıñ Törkiyä öçen zur ähämiyätkä iyä buluın belderüe kötelä.

Ministrlıq çığanaqlarına kürä, Fidan İranğa qarata teläsä nindi xärbi qatışuğa Törkiyäneñ qarşı buluın qabatlap, mondıy adımnıñ citdi regional’ häm dön’yaküläm qurqınıçlar tudıra alaçağı turında kisätäçäk.

Fidan şulay uq, Änkaranıñ dialog yulı belän xäzerge kiyerenkeleklärne yomşartırğa häm Tähran­nıñ atom -töş programması tudırğan problema­nı tiz häm tınıç yul belän xäl itügä yärdäm itärgä äzer buluın assızıqlayaçaq, kiräk bulğan oçraqta Törkiyäneñ yärdäm kürsätä alaçağın da belderäçäk.

Fidan­nıñ tarixi bäyläneşlär belän bäyle ike däwlät Törkiyä häm İran arasındağı mönäsäbätlärneñ töbäk iminlege, totrıqlılığı häm mullığı öçen möhim buluına basım yasawı kötelä.

Törkiyä tışqı êşlär ministrı 2014 yılda oyışqan Törkiyä–İran yuğarı däräcäle xezmättäşlek şurası kebek ğamäldäge mexanizmnär aşa xezmättäşlеkne tağın da köçäytü telägen dä citkeräçäk.

Söyläşülärneñ töp yünäleşe ike yaqlı säwdäne küptän bilgelängän 30 milliard dollar maqsatına citkerü öçen arttıru bulaçaq.

Fidan Törkiyäneñ säwdä, ênergetika, transport häm bäyläneş ölkälärendä, şul isäptän çik buyındağı säwdä üzäklärendä  xezmättäşlekne kiñäytügä qızıqsınuın belderäçäk.

İminlek ölkäsendä xezmättäşlek söyläşülärdä möhim urın alaçaq.

Şulay uq İran çiklärennän tış töbäklärdä barğan krizislar da qaralaçaq.

Fidan, Törkiyäneñ Ğazzä tınıçlıq planınıñ ikençe êtabı belän bäyle mexanizmnarğa yärdäm kürsätüen assızıqlap, citärlek külämdä gumanitar yärdämne töbäkkä özleksez kiterüne dä kertep, konkret çaralarnı tiz arada tormışqa aşıruğa östenlek biräçäk.

Süriyä mäs’äläsendä isä, Törkiyä tışqı êşlär ministrı ildä tınıçlıq häm iminlekne nığıtunıñ töbäk totrıqlılığın nığıtaçağına basım yasayaçaq.

Törkiyä häm İran soñğı tapqır 2024 yılnıñ ğıynwarında Änkarada Törkiyä ilbaşı Räcäp Täyyip Ärdoğan häm märxüm İran ilbaşı İbrahim Räisi citäkçelegendä Yuğarı däräcäle xezmättäşlek şurasınıñ 8 nçe utırışın uzdırğan ide.

Ärdoğan İran ilbaşı Mäsud Päzäşkiyan belän soñğı tapqır 2025 yılnıñ sentyabrendä Qıtayda ütkän Şanxay xezmättäşlek oyışması sammitında oçraşqan ide.