Törkiyä Cömhüriäteneñ Milli küzläw oyışması räise İbrahim Qalın, İzrail, AQŞ häm İrannı üz eçenä alğan suğış däwam itkän oçraqta, tağın da kiñräk global' kriziska äylänü qurqınıçı barın belderde.
Şimbä könne İstanbulda ütkärelgän “STRATCOM-2026” sammitında çığış yasağan İbrahim Qalın: "Pandemiädän birle dönyabız şaqtıy kritik krizislardan uza," — dide häm 2022 yılda başlanğan Rusiyä-Ukraina suğışına 4 yıl buluın, anıñ niçek tämamlanaçağına bäyle äle dä açıq küzallau yuqlığın bilgeläp ütte.
Qalın monnan tış, İzrailneñ 2023 yılnıñ 7 oktäbrendä Ğazzädä başlağan genośid suğışı näticäläre xis itelüen äytte. "Ğazzädä tınıçlıq urnaştıru tırışlıqları däwam itkändä, İzrailneñ qanun bozuları, yawlaw häm anneksiya sayäsätläre bertuqtawsız däwam itä,” – dide.
Töbäktäge üzgäreşlärgä bäyle bularaq Qalın, uzğan iyun' ayındağı 12 könlek İzrail-İran suğışınıñ xäzerge İran bäreleşläreneñ repetiśiyase buluın äytte. Şulay uq ul Törkiyäneñ suğışnıñ kilep çığuın buldırmaw häm anıñ cäyelüen tuqtatu öçen intensiv diplomatik tırışlıqlar quyuın belderde.
Qalın: "Qızğanıç, İzrail başlağan bu regional' suğışnıñ könnän-kön global' krizisqa äylänüe häm ilbaşıbız äytüençä 8 milliard keşegä täêsire bulaçaq suğışqa äylänüe xäzerge waqıtta çınbarlıq buluğa taba bara. Bezneñ barlıq tırışlığıbız, iñ elek, bu suğışnıñ mömkin bulğan qädär tizräk tämamlanuına yünälteläçäk," — dide.
Qalın şulay uq bäreleşneñ töbäktäge bülenülärne tiränäytä alaçağı turında kisätte.
Milli küzläw oyışması räise tübändägeçä däwam itte: "Bu suğışnıñ xisaplanğan näticälärennän berse — İrannıñ atom-töş potenśialın yuqqa çığaru ğına tügel, monnan küpkä qurqınıçraq bularaq — töbäkneñ nigez saluçıları bulğan törkilär, kördlär, ğaräplär häm farsılar arasında distälärçä yıllar däwam itäçäk qardäşlär suğışına nigez äzerläyäçäk adımarnıñ yasaluı."
"Bez Törkiyä bularaq berwaqıtta da fetnä yalqınına utın taşıuçı taraf bulmadıq häm bulmayaçaqbız. Kiräk bulsa, ut şarın qulıbızğa alırbız, kükrägebezdä suıtırbız, läkin anı berwaqıtta da fetnä utına atmabız," — dip östäde ul.
Törkiyäneñ küzläu oyışması räise monnan tış, İranğa qarşı alıp barılğan suğışnıñ xalıqara xoquqta qanuni nigeze bulmawın äytte.
