Fälästin däwläte AQŞ ilbaşı Donald Tramp täqdim itkän Gazzäda suğışnı tuqtatu täqdimen xupladı häm anıñ tınıçlıq yulın bilgeläw sälätenä ışanıç belderde.
Räsmi “WAFA” xäbär agentlığı aşa yasalğan belderüdä: "İlbaşı Donald Trampnıñ Ğazzädä suğışnı tuqtatu öçen çın küñeldän häm tırışlıq belän alıp barğan êşlären xuplıybız häm anıñ tınıçlıq yulın tabarğa sälätle buluına ışanabız," - diyelde.
Belderüdä Fälästinneñ AQŞ, töbäk däwlätläre häm xalıqara partnyerlar belän bergä eşläp, kiñ qırlı kileşü tözergä äzer buluı assızıqlandı.
Kileşü gumanitar yärdämne Ğazzägä citkerüne, totıqlar häm äsirlärne azat itüne, tınıç xalıqnı yaqlaw mexanizmnarı buldıru häm ut açunı tuqtatu garantiyalären üz eçenä alırğa tiyeş dip äytelde. Şulay uq, cirne qanunsız räweştä yawlap alu, keşelärne mäcbüri räweştä küçerü häm xalıqara qanunnı bozuçı ber yaqlı çaralarnı buldırmaw taläpläre dä quyıldı.
Fälästin belderüendä şulay uq totqarlanğan salım keremnären birü, İzrailneñ tulısınça çigenüe häm Ğazzädä yawlap alınğan Yordannıñ könbatış üzänlege häm Könçığış Qodüstä Fälästin cirlären häm oyışmaların berläşterü çaqıruı da yasaldı.
Belderüdä: “Bäysez häm möstäqıyl Fälästin däwläte İzrail belän tınıçlıqta häm yaxşı kürşelär bulıp yäşägän ike däwlätle çişeleş nigezendä ğadel tınıçlıq maqsatın qabat raslıybız,” – dip äytelde.
Fälästin räsmi zatları şulay uq suğış tämamlanğannan soñ ber yıl eçendä reformalar häm parlament saylawları ütkärergä wäğdä itte.
Belderüdä Fälästinneñ zamança, demokratik häm qoralı bulmağan, plyuralizm häm xakimiyätne tınıç yul belän tapşıru prinŝiplarına bäyle buluı assızıqlandı.
"Töbäk xalıqları öçen tınıçlıq, iminlek häm totrıqlılıq urnaştıru maqsatı belän AQŞ häm barlıq taraflar belän uñay häm konstruktiv räweştä êşlärgä äzerbez," - diyelde belderüdä.
Töbäk liderları plannı xuplıy
Törkiyä häm berniçä garäp häm İslam däwläte AQŞ ilbaşı Donald Trump täqdim itkän Ğazzädä utnı tuqtatu planın xuplap, kileşüne tormışqa aşıru öçen Vaşington citäkçelege belän êşlärgä äzer buluların belderde.
Soğud Ğaräbstanı, Yordaniya, Berläşkän Ğaräp Ämirlekläre, Qatar häm Misır tışqı êşlär ministrları tarafınnan yasalğan urtaq belderüdä AQŞ häm bäyläneşle taraflar belän xezmättäşlek başqarırğa äzer buluları citkerelde.
Törkiyä ilbaşı Räcäp Tayyip Ärdoğan: “Ğazzädä qoyıluçı qannıñ tuqtawı häm utnı tuqtatu öçen AQŞ ilbaşı Xörmätle Tramp kürsätkän tırışlıqnı häm liderlıknı täqdir itäm. Taraflar qabul itäçäk ğadel häm daimi tınıçlıqnıñ urnaşuı öçen Törkiyä bularaq bez dä älege barışqa öleş kertergä däwam itäçäkbez,” – dide.
Bar dönyadan xuplawlar kilä
Dönya liderları da AQŞ ilbaşı Donald Tramp täqdim itkän suğışnı tuqtatu planın xupladı häm barlıq taraflarnı plannı qabul itärgä häm tınıçlıq yulına basarğa çaqırdı.
