Fälästinle totqınnar cämğıyäte İzrail törmälärendä mäxkümnärgä qarşı êlektroşok cihazları häm plastik yädrälär qullanu oçraklarınıñ artuın, şulay uq, “Negev” häm “Ofer” törmälärendä qıçıtu çire taraluın xäbär itte.

Cämğıyät belderüendä advokatlarnıñ sentyabr ayında cide İzrail törmäsendä distälägän totkın, şul isäptän, xatın-qızlar häm balalar belän kürüşüen äytte.

“Totqınnardan soraştıru İzrail törmä sistemasında daimi räweştä keşeleksez mönäsäbät häm räximsez çaralar başqarıluın, monı cinayät dip bäyälärgä mömkin buluın kürsätte”, dip belderde cämğıyät çärşämbe könne.

Oyışma törmälärdä basım ısulları artuın, bigräk tä êlektroşok cihazları häm plastik yädrälär qullanu oçraklarınıñ kübäyüen bilgeläde. Şulay uq “Negev” häm “Ofer” törmälärendä qıçıtu çire kiñ taraluın da assızıqladı.

Totqınnarnıñ süzlärenä qarağanda, törmädä şartlar üzgärmi, yaxşırtu bilgeläre kürenmi. Alar citärlek rizıq bulmawın häm daimi açlıq xälenä töşülären, şulay uq, iñ zarur äyberlärdän dä mäxrüm buluların äytä.

Xatın-qız totqınnar çişenderep tikşerü, köç qullanu häm maxsus ixtıyacların kürä almaw oçrakları turında da belderü yasaldı.

“Negev” törmäse meñnärçä totkın yabılğan iñ zur urınnarnıñ berse. Belderüdä assızıqlanğança, ul Ğazzä suğışı başlanğannan birle basım, cäberläw häm höcüm üzägenä äwerelgän.

Törmä, şulay uq, çir häm êpidemiya üzägenä äylängän, bu isä küp totkınnarnıñ ülemenä kitergän.

Totqınnar kiyem citmäw turında da şikayät itä, qayberläre altı ay buyı kiyemnären almaştıra almawların äytä.

Belderüdä “Damon” törmäsendäge xatın-qız totkınnarnıñ süzlärenä dä urın birelä. Alar basım, çişenderep tikşerülär, qıynawlar häm maxsus ixtıyacların kürä almaw turında söyläde.

“Başqarılğan cinayätlär süzlär belän añlatıp bulmaslıq däräcägä citte,” dip belderde cämğıyät, xalıqara cämäğätçelekne tiz arada çaralar kürergä çaqırıp.

11100dän artıq fälästinle totqınnıñ İzrail törmälärendä cäberläw, açlıq häm sälamätlek krizisları belän oçraşuı belderelä.