İzrail tışqı êşlär ministrlığınıñ belderüenä qarağanda, İzrail häm Boliviya Tel’-Avivnıñ Ğazzädäge genośidı säbäple ike yıl tuqtap torğan diplomatık mönäsäbätlärne torğızdı.
İzrail tışqı êşlär ministrı Gideon Saar belän anıñ Boliviyadağı wazıyfadaşı Fernando Aramayo şişämbe könne Vaşingtonda diplomatık bäyläneşlärne yañadan urnaştıru turında urtaq beldergegä qul quydılar.
Saar tizdän ilçelär bilgelänäçägen äytte.
Uzğan atnada Boliviya AQŞ häm İzrail watandaşları öçen viza taläben ğamäldän çığaruın citkerde.
Bu adımnar üzäk uñçı Rodrigo Paz noyabr’ ayında yaqınça 20 yıllıq sulçı xakimiyätkä noqta quyıp ilbaşı bulıp saylanğannan soñ buldı.
Boliviya 2008–2009 yıllardağı Ğazzägä qarşı İzrail höcümnärenä cawap bularaq, 2009 yılda Tel’-Aviv belän diplomatık mönäsäbätlären özde.
Mönäsäbätlär 2019 yılda qısqa waqıtqa torğızılğan bulsa da, İzrailneñ qamaw astındağı Fälästin cirenä räximsez suğışı arqasında 2023 yılda qabat tuqtatıldı.
Kolumbiya, Braziliya, Çili, Kuba, Beliz häm Nikaragua kebek berniçä Latın Amerikası ile dä Ğazzädäge genośidqa qarşı protest belderep, İzrail belän diplomatık, iq’tisadi häm xärbi êlemtälärne özde.
2023 yılnıñ oktyabrennän birle İzrail ğaskärläre Ğazzädä kübese xatın-qızlar häm balalar bulğan 70 meñnän artıq keşene üterde, 171 meñnän artıq keşene yaraladı.
Bu cimergeç höcüm qamaw astındağı töbäkne tulısınça xäräbägä äyländerde.
