Kreml süzçese Dmitriy Peskov Rusiyä däwlät başlığı Vladimir Putin häm AQŞ ilbaşı Donald Trampnıñ kiläçäktä sammit ütkärü mömkinlege barlığın belderde.

Comğa könne Mäskäwdä ütkän matbuğat oçraşuında Peskov bu añlaşunıñ alarnıñ soñğı cämäğätçelek aldındağı belderülärenä nigezlänüen äytte.

“Äye, ilbaşı Tramp älegä sammit oyıştıru turında uylamawın belderde. Läkin soñğı ike kön êçendä ul bu oçraşunıñ kiläçäktä ütkärelü mömkinlegen kire qaqmawın berniçä tapqır qabatladı,” dip äytte ul.

Peskov, konkret datalar yäisä detallär kileşelmägänlektän, plannıñ bozıluı turında söyläwne döres tügel dip sanıy.

“Tramp ta, Putin da waqıtın buşqa sarıf itärgä telämi; alar oçraşu öçen genä cıyılırğa niyätlänmi,” dip östäde ul.

Süzçe liderlar oçraşuınıñ näticäle buluı öçen başta ministrlar däräcäsendä äzerlek êşläre ütkärelüen, ayırım alğanda, Rusiya tışqı êşlär ministrı Sergey Lavrov häm AQŞ däwlät särqatibe Marko Rubio tarafınnan êşlär başqarılırğa tiyeşlegen assızıqladı.

‘Ozın pauza’

Ukraina belän mönäsäbätlär turında sorawğa cawap birgändä, ul söyläşülärneñ xäzerge xäleneñ “ozın pauza” buluın, monıñ Kievnıñ söyläşülär protsessın tizlätü teläge bulmawı belän bäyle ikänen äytte.

“Kievnıñ tınıçlıq söyläşülären tizlätü teläge bulmawı, berençe çiratta, ‘Awrupa citäkçeläre’ tarafınnan aktiv räweştä yaqlana,” dip assızıqladı ul.

Putinnıñ AQŞ Ukrainağa “Tomahawk” raketaların tapşırsa, “şaqqatırlıq cawap” bulaçağı turında kisätüenä kilgändä, Peskov monıñ bilgele ber qorallarga tügel, ä ğomumän, teläsä-nindi höcümgä qağıluın añlattı.

Könbatışnıñ yaña sanktsiyälärenä kilgändä, ul Rusiyä üz millät mänfäğätlärenä turı kilgänçä cawap biräçäk dip belderde.

“Xäzer bez iğlan itelgän sanktsiyälärne analizlıybız. Älbättä, bez üz mänfäğätlärebezgä turı kilgänçä êş itäçäkbez. Bu bezneñ töp maqsat bulıp qala,” dip östäde ul.

İlbaşı Trampnıñ yaña sanktsiyälärneñ täêsiren altı aydan bäyäläw turındağı soñğı belderüen qabatlap, Kreml süzçese dä şundıy uq yulnıñ totılaçağın äytte.

“Çınnan da, bez altı aydan soñ xällärneñ niçek üzgärüen qarayaçaqbız. Xäzerge waqıtta bulğan xällärne küzätep, uzğan yıl häm annan aldağı yıllarnıñ waqıyğaların iskä töşerep, xällärne altı aydan, bälki ber yıl soñraq ta yaxşıraq añlarbız dip ömetlänäbez,” dip äytte ul.

Yaponiyä xökümäte räise Sanaê Takaiçinıñ Rusiyä belän tınıçlıq kileşüe tözü telägenä kilgändä, Peskov Mäskäwneñ dä bu teläkne urtaqlaşuın rasladı.

Räsmi zat, êlekke Yaponiyä xaqimiyätläreneñ “dus bulmağan mönäsäbätläre” säbäple dialognıñ tuqtalıp qaluın äytte.