Maduro televideniyedän tapşırılğan çığışında: "Bügen Venesuêlla tağın da kübräk milli köçkä iyä, tağın da berläşkän wazğiyättä häm qorallı köräş zarur bulğan oçraqta bäysezlegebezne saqlarğa häm häm här şartta tınıçlıqnı urnaştırırğa tağın da kübräk äzer”, - dip äytte.

Ul Waşingtonnı xärbi konflikt çıgarırğa tırışuda ğäyepläde, bu isä basıp alu öçen säbäp bula ala, dip äytte häm: "Telägän äyberläre xärbi inśident ide. Provokaśiyälärgä birelmädek, birelmäyäçäkbez dä”, - dip iskärtep uzdı.

Maduro narkotiklar säwdäse turındağı ğäyepläwlärne üz xökümäten bärep töşerü öçen yasalğan säbäp dip atadı.

"Barça narkotiklar häm narkotik säwdäse turındağı xikäyälär – yalğan. Bu – säbäp. Alar rejimnı almaştırırğa, ilneñ baylıqların üzläşterergä, neft rezervların kontrol astına alırğa teli", – dip belderde ul.

Ul Karib diñgezen "töten häm raketalar" belän tutıru zur konfliktqa, tartqalaşuğa kiterä ala, dip kisätte.

"Amerika Quşma Ştatları häm böten dönya belä: bu – Venesuêllanı totrıqsızlandıru, rejimnı almaştırırğa tırışu häm neft', gaz, timer häm altınnı üzläşterü öçen qorılğan xärbi operaśiyä", – dip östäde ul.

Maduro Waşington belän mönäsäbätlärneñ AQŞ diñgez köçläre urnaştırılğannan soñ naçarayuın äytte.

"AQŞ xökümäte belän ike kanaldan aralaşu bar ide, ämma alar tarafınnan bombalar belän yanawlar, üterü yanawları häm şantaj arqasında bu mönäsäbätlär yuqqa çıqtı", – dip belderde ul.

Ul AQŞ däwlät särqatibe Marko Rubionı "ülem häm suğış xucası" dip atadı.

Anıñ bu süzläre AQŞ xärbiläre Venesuêlladan narkotik taşığan dip farazlanğan ber köymägä höcüm itep, öç keşene üterüe turında xäbär çıqqan säğätlär aldınnan äytelde. Monnan alda, 2 sentyabrdä bulğan höcüm näticäsendä 11 keşe ülgän ide.

AQŞ xakimiyäte iyül ayında "Cartel de los Soles"nı terror oyışması dip iğlan itep, anıñ Venesuêlla räsmiläre belän bäyläneşe bar dip ğäyepläde. Şulay uq, AQŞ Maduro qulğa alınsın öçen 50 million dollar büläk täqdim itte häm narkotikqa qarşı operaśiyälär qısasında Karib diñgezenä xärbi köymälär cibärde.