İlbaşı Räcäp Tayyip Ärdoğan sişämbe könne yasağan belderüendä Süriyädä bigräk tä êlekke rejimnıñ yıllar buyı däwam itkän bäreleşläre waqıtında cimerelgän toraq mäydannarın telgä alıp, ildä zur tözeleş häm torğızu mobilizaśiyäseneñ başlatılaçağın iğlan itte.

Ärdoğan, böten Süriyädä bigräk tä êlekke rejimnıñ miçkä bombaları belän xäräbälärgä äylängän toraq urınnarında zur tözeleş häm tözekländerü êşçänlegeneñ başlanaçağın belderep, Süriyä totrıqlılıqqa häm iminlekkä qawışqan sayın monıñ uñay yoğıntılarınıñ Törkiyä belän bergä böten kürşe illärneñ turıdan-turı xis itäçägen äytte.

Ärdoğan monnan tış Äsäd citäkçelege waqıtında bik küp körd keşese watandaşlıqtan mäxrüm itelgän Süriyädä yaña citäkçelekneñ körd watandaşlarınıñ töp xoquqların ışanıç astına alğan soñğı qararın qänäğätlelek belän qarşılawın iskärtep uzdı.

Mäñge qardäşlek

İlbaşı Äрдоган, ildä berdämlekkä çaqırıp, Süriyä xalqın êtnik büleneşlärne köçäytü tırışlıqlarınnan kisätte häm körd cämğiyätlären dä çit il uyınnarına aldanmasqa öndäde.

Ärdoğan: “Körd qärdäşlärebezdän, watandaşlarıbızdan sorıym, mäñgelek qärdäşlegebezgä höcüm itügä, aramızda nizag çığaruğa yünälgän uyınnarğa birelmägez”, - dide.

Törkiyäneñ Süriyäneñ yaña xökümäte belän yaqın xezmättäşlek êçendä, çikläreneñ aryağında yäşäwçe körd cämğiyätlärennän kilgän humanitar yärdäm teläklärenä cawap birüen dä bilgeläp uzuçı Törkiyä Däwlät başlığı, Süriyäneñ berdäm däwlät bulıp qaluınıñ zarurlığına basım yasap, parallel qorallı qorılışlarnıñ bula almawın belderde.

"Däwlät êçendä däwlät, ayırım qorallı köç bulmas”, - dip äytüçe İlbaşı berdänber yaraşlı yulnıñ taraflar arasında ireşelgän kileşülärgä turı kiterep tınıçlıq çişeleşeneñ buluın iskärtep uzdı.

Ärdoğan: “İreşelgän kileşü ruxına turı kiterep, mäs’äläne tınıç yul belän xäl itü – berdänber yul”, - dip äytte.