Tönyaq Koreya citäkçese Kim Çen-In, ägär dä Vaşington Pxenyannan atom-töş qoralınnan baş tartu taläben kire alsa, AQŞ belän dialogqa qarşı bulmawın belderde. Bu xaqta KCNA däwlät mäğlümat agentlığı xäbär itte.
Yakşämbe könne Kim Yuğarı xalıq cıyılışında yasağan çığışında AQŞ ilbaşı Donald Tramp belän yaxşı xatiräläre barlığın iskä töşerä. İke citäkçe Trampnıñ berençe ilbaşı çorında öç tapqır oçraşqan ide.
“Ägär AQŞ bezne atom-töş qoralsızlandıru turındağı absurd fikerennän baş tartsa häm çınbarlıqnı qabul itsä, şulay uq, çınlap ta tınıç yänäşä yäşäw telägen kürsätsä, bezneñ AQŞ belän söyläşüdän tayçınu öçen säbäbebez yuq,” – dip äytä Kim.
Kim süzlärençä, ilneñ iminlegen saqlaw öçen atom-töş qoralın buldıru – isän qalu mä’säläse, çönki AQŞ häm Könyaq Koreyadan kilgän citdi yanawlar bar.
Ul Vaşington häm Seuldan kilgän soñğı dialog täqdimnären “çın küñeldän tügel” dip kire qaqtı, çönki alarnıñ töp maqsatı – Tönyaq Koreyanıñ köçen kimetü häm rejimnı yuq itü, dip belderde.
Könyaq Koreyanıñ Pxenyannıñ atom-töş programmasın êtaplap tuqtatu täqdime dä monıñ dälile bulıp tora, dip östäde ul.
Tınıçlıq täqdimnäre
Könyaq Koreya ilbaşı Li Dje Mên, iyün ayında wazıyfasına kereşkännän birle, tınıçlıq täqdimnäre belän çıqtı, Pxenyan belän dialog kiräklegen äytte häm ışanıç tudıru öçen adımnar täqdim itte, näticädä Tönyaq Koreyanıñ atom-töş programmasın tuqtatu maqsatın quydı.
Tönyaq Koreyanı söyläşü östälenä qaytaru öçen döres şartlar tudıru zarur häm bu êşlärdä Tramp möhim rol uynıy ala, dip belderde Li.
Analitiklar fikerençä, Kimnıñ atom-töş qoralın üsterü maqsatı – AQŞnı Tönyaq Koreyanı atom däwläte bularaq qabul itärgä mäcbür qılu, näticädä, iqtisadi häm iminlek ölkäsendä östenleklärgä ireşü.
Kim, şulay uq, AQŞ täêsiren kimetü maqsatında, Rusiya häm Qıtay belän traditsion xezmättäşlekne nığıtu öçen tırışa.
Tönyaq Koreyanıñ AQŞ belän turıdan-turı söyläşülär alıp barırğa tırışuı arqasında Seulda atom-töş krizisın çişü tırışlıqlarında kiläçäktä üz tawışın yuğaltu borçıluı arta bara. Bu borçular uzğan yıl Kim Tönyaq Koreyanıñ Könyaq belän tınıç berläşü maqsatınnan baş tartuın häm Könyaqnı daimi doşman itep kürsätü öçen konstitutsiyäne üzgärtü turında beldergännän soñ tağın da köçäyde.
