Törkiyäneñ sänägät törkeme “OYAK” belän Somalineñ Balıqçılıq häm zäñgär iqtisad ministrlığı balıqçılıq tarmağında xezmättäşlek başqaru öçen strategik xezmättäşlek häm xezmät kileşüen imzaladı.

Çärşämbe könne başqala Änkaradağı “OYAK üzägendä oyıştırılğan imza quyu tantanasında Törkiyäneñ Milli saqlanu ministrı Yaşar Gülär, Somalineñ portlar häm diñgez transportı ministrı Abdulkadir Mohamed Nur, Somalineñ Balıqçılıq häm zäñgär iqtisad ministrı Äxmät Xäsän Aden, Törkiyäneñ ğomum ştab başlığı, general Sälcuk Bayraktaroğlu, “OYAK” başlığı Zekai Aksakallı häm “OYAK”nıñ yuğarı däräcäle citäkçese Murat Yalçıntaş qatnaştı.

Kileşüneñ maqsatı – Somalidağı balıqçılıq êşçänleklären üzäkläşterelgän, totrıqlı häm tulısınça terkälgän qısalar êçendä başqarıluın täêmin itü.

Kileşü qısalarında, bu qısada qorılğan “SOMTURK” isemle şirkät Somalineñ êksklyuziv iqtisadi töbägendäge balıqçılıq êşçänlekläre belän bäyle barlıq liśenziya barışların citäkläwdän cawaplı bulaçaq. Somali sulıqlarında balıq totu röxsätlären “SOMTURK” kenä biräçäk.

Älege kileşü yärdämendä Törkiyäneñ balıqçılıq tarmağı dönyanıñ iñ bay balıq rezervlarınnan sanaluçı Somali sularına ireşä alaçaq.

Şulay uq êş belän täêmin itüne arttıru, cirle iqtisadnıñ nığıtıluı häm östämä qıymmätneñ Somali xalqı mullığına çağıldırıluın taêmin itü dä maqsat itelä.

Somalineñ portlar häm diñgez transportı ministrı Abdulkadir Mohamed Nur X platformasında kileşüne ike taraf arasındağı köçle partnyerlıknı häm ike yaqlı ışanıçnı çağıldıruçı borılış noqtası; daimi üseş häm iqtisadi xezmättäşlekkä bulğan urtaq yöklämä dip atadı.