AQŞta ilbaşı Donald Tramp xakimiyätkä kilgännän birle, yäğni gıynvar ayınnan başlap, il buyınça 480 meñnän artıq dokumentları bulmağan migrant totqarlanğan. Bu xaqta AQŞ êçke iminlek ministrı Kristi Noêm belderde.
Düşämbe könne Florida ştatında uzğan matbuğat oçraşuında ul bolay dip söyläde: “Ğıynvar ayınnan birle êçke iminlek departamentı 480 meñnän artıq qanunsız migrantnı totqarladı. Şularnıñ 70 protsentı cinayät öçen êzlänä yäki inde êlek xökem itelgän,” dip äytte Noêm.
Bu belderü Tramp administratsiyäseneñ ikençe möddätendä migratsiyä qanunnarın ütätügä iğtibarın arttıruın kürsätä.
“İl buyınça bez cämğiyätlärne tağın da iminräk xälgä kiteräbez, şulay itep, ğailälär üsä ala, alar uñışqa ireşä ala häm bu il täqdim itkän irekne tulayım qullana ala,” dip östäde ul.
Uzğan ayda ministrlıq 20 gıynvardan birle 2 million qanunsız migrantnıñ AQŞtan kitüen belderde. Bu sannar 1,6 million üzixtiyari räweştä kitüçelärne häm 400 meñnän artıq räsmi deportatsiyälärne üz êçenä ala..
‘Rekordlı kürsätkeçlär’
Şul uq waqıtta, Tramp düşämbe könne üz administratsiyäseneñ “rekordlı däräcädäge” xoquq saqlaw ğamällären maqtadı, FBIdan alğan yaña statistikağa tayanıp, köç qullanu cinayätläre, narkotiklarğa qarşı operatsiyä häm balalarnı saqlaw êşçänlekläre turında belderde.
Ul “Truth Socia”l platformasında bolay dip yazdı: “Minem idaräm astında FBI ğaҗäyep êş başqara. 20 gıynvardan birle 28 meñnän artıq köç qullanuçı cinayätçe totqarlanğan (rekordlı kürsätkeç!), 6 meñnän artıq qanunsız qoral tartıp alınğan, uramnarıbız 1,700dän artıq bala räncetüçe häm 300 keşe urlawçıdan çistartılğan”.
Ul, şulay uq, 5 meñ balanıñ qotqarıluın häm agentlarnıñ 1,900 kilogram fentanyl qulğa töşerüen äytte, bu isä “125 million keşene üterergä citärlek” dip bäyälände.
