Törkiyä ilbaşı Räcäp Tayyip Ärdoğan Gaziantepta Kamil Ocak sport zalında oyıştırılğan programmağa videomöräcäğat’ cibärep Näwrüz şatlığın urtaqlaşqan barlıq tuğandaş xalıqlarnı  täbrik itte.

Näwrüzneñ yaz xäbärçese häm tabigat’neñ uyanu simvolı buluın bilgeläp ütkän Ärdoğan bu mäğ’näle könneñ Törkiyägä, töbäkkä häm böten keşelekkä tınıçlıq, mullıq kiterüen teläde.

Ul Näwrüzneñ Törkiyädä genä tügel, ä kürşe töbäklärdä  dä yaña başlanğıçlar simvolına äylänüennän qanäğat’ buluın belderep bolay dide:
“81 vilayätebezdä häm törki dön’yada ber ük xislär belän Näwrüz uçağı tiräsendä berläşäbez”.

İlbaşı Ärdoğan bu urtaq añnı nığıtu maqsatınnan Näwrüzneñ cämğıyät’neñ barlıq qatlamnarı öçen urtaq kön itep qabul itelüen äytte.

Ul şulay uq Törkiyäneñ 2026 yılda 13nçe Ğailä mäclesı sammitın qabul itäçägen iskärtep, Azärbaycannan Qazaqstanğa, Qırgızstannan Üzbäkstanğa, Törekmänstannan Tön’yaq Kipr Törek Cömhüriyätenä häm Macarstanğa qadär barlıq dus häm tuğandaş xalıqlarnı Näwrüz bäyräme belän qotladı.

 Räcäp Tayyip Ärdoğan ayıruça töbäktäge bäreleşlärgä iğ’tibar yünältep bolay dide:

“Süriyä, Ğıyraq häm şuşı könnärdä suğış kitergän problemalar belän köräşüçe iranlı qardäşlärebezne dä Näwrüz bäyräme belän qotlıym.  Bu mäğ’näle könneñ töbäktäge suğışlarnıñ tämamlanuı öçen säbäp buluına ömetlänäm”.

Törkiyä ilbaşı üz çığışın “Yaz xäbärçese Näwrüzneñ yöräklärebezgä ömet, cämğıyät’lärebezgä, dön’yabızğa tınıçlıq kiterüen telim” digän süzlär belän tämamladı.