Törkiyä ilbaşı Räcäp Täyyip Ärdoğan İslam xezmättäşlek oyışması äğ’zaları arasında transport integraśiyäsen köçäytergä çaqırdı, näticäle häm ışanıçlı çeltärlärneñ İslam dön’yasınıñ iq’tisadi potenśialın açuda töp rol’ uynawın äytte.
Pänceşämbe könne İstanbulda ütkärelgän İslam xezmättäşlek oyışması transport ministrları cıyılışına cibärgän video möräcäğatendä Ärdoğan möselman illäreneñ Aziyädän Afrikağa, Awrupadan Yaqın Könçığışqa qadär suzılğan kiñ geografiyägä taraluın, tabiği koridorlarğa, dinamik yäş’ xalıqqa häm tiz üsä torğan bazarlarga iyä buluın assızıqladı.
“Läkin bu zur potenśialnı tulısınça ğämalgä aşıru häm geografik östenleklärne strategik köçkä äwerelderü öçen bezgä näticäle, ışanıçlı häm integraśiyälängän transport çeltärläre kiräk”, – dide ul.
Ärdoğan avtoyullar, timer yulları, portlar häm aêroportlar arasındağı bäyläneşlärne nığıtu äğ’za däwlätlär arasında säwdäne genä tügel, ä sośial’ häm mädäni bäyläneşlärne dä köçäytäçägen iskärtte.
Marmaray tunnel’ kiçüe, Avraziya tunnele häm zur küperlärne dä kertep Törkiyäneñ soñğı çordağı zur infrastruktura proyektlarına işarät itkän ilbaşı Törkiyäneñ global’ säwdä marşrutların nığtuın häm timer yul, diñgezçelek häm aviaśiya mömkinleklären kiñäytüen äytte.
Ul Törkiyäneñ Trans-Xäzär Könçığış-Könbatış Urta koridor proyektına kürsätkän yaqlawı belän tarixi Yefäk yulın zamança qaraş belän yañartuın belderde.
“Läkin bez bu investiśiyälärne barı tik milli qısalarda ğına bäyälämibez. Maqsatıbız – İslam xezmättäşlek oyışması äğ’zaları belän integraśiyäne köçäytü, çik ar’yağı koridorların üsterü häm urtaq proyektlar aşa östämä qıymmät tudıru”,– dide ul.
İlbaşı konferenśiya waqıtında alıp barılğan konstruktiv söyläşülärneñ möhim adımnarğa kiterüen bilgeläp ütte.
“Äğ’za däwlätlär arasında transport bäyläneşlären köçäytäçäk, xalıqara platformalarda berdämlekne arttıraçaq häm Törkiyäneñ İslam xezmättäşlek oyışmasınıñ çirattağı räislege waqıtında transport bäyläneşe strategiya dokumentın äzerläyäçäk yul kartasın buldıru öçen möhim qararlar qabul ittek”, – dide ul.
“Hiçşiksez, bu qararlarnıñ näticäle ğamälgä aşırıluı öçen texnik oçraşularnıñ özelmäwe häm küzätü mexanizmnarınıñ yaxşı êşläwe möhim. Bez bügen kürsätkän iradä moña yul açar dip ışanam”, – dip östäde ilbaşı.
