Törkiyä tışqı êşlär ministrı Xaqan Fidan, global tärtipneñ “paraliç kiçerüen”, monıñ xalıqara oyışmalarga ışanıçnı kimetüen häm illärne ber yaqlı adımnarğa êtärüen belderep, legitimlıq krizisı turında söyläde.
Şimbä könne İstanbulda uzğan “TRT World Forum”da çığış yasağan Fidan bolay dide: “Dön’ya ber qotıplı sistemadan yıraqlaşa häm xäzer yaña tärtipne küp’yaqlılıqqa nigezlänep tözibezme, ällä cimergeç köndäşlekkä kire qaytaçaqbızmı digän sorawğa cawap birergä tiyeş”.
Fidan partnyerlıqqa häm inklyuzivlıqqa nigezlängän köçle häm reformalaştırılğan xalıqara sistema buldırırğa çaqırıp, “Bügen bez oçraşqan qıyınlıq – qağydälärneñ bulmawı tügel, ä alarnıñ tigez qullanılmawı” dide.
Ul ayruça Berläşkän Millätlär Oyışmasın kompleklslı reformalaştıru kiräklegenä basım yasap, bu oyışmanıñ üzeneñ tözelü wäğ’dälären cirenä citkerüdä könnän kön qıyınlıqlar kiçerüen belderde.
Ministr şulay uq Törkiyäneñ berniçä ilgä östenlek birü urınına, küpçelek illärne nıgıtqan, tağın da demokratik häm wäkillekleräk BMO İminlek şurasın yaqlawın belderde.
“Ğazzädä utnı tuqtatu äle dä totrıqsız”
Yaqın Könçığışqa da tuqtalğan Fidan legitimlıqnıñ qaqşawı häm global’ idarädäge paraliçnıñ iñ faciğale räweştä Ğazzädä çağılış tabuın äytte.
Fidan Törkiyäneñ ilbaşı Räcäp Täyyip Ärdoğannıñ vizionı nigezendä genośidnı tuqtatu häm ğadellekne nığıtu öçen diplomatik tırışlıqlarnı äydäp baruın, moña Ğazzä öçen Urtaq İslam xezmättäşlek oyışması–Garäp Ligası êlemtä törkemen tözü dä kerüen belderde.
Ul N’yu-York häm Şarm äl-Şäyx şähärlärendäge soñğı oçraşularnı tınıçlıqqa taba möhim adımnar dip bäyäläde, läkin İzrailneñ däwam itüçe höcümnäre arqasında utnı tuqtatunıñ haman da totrıqsız bulıp qaluın assızıqladı.
Fidan ğadel häm daimi tınıçlıqnıñ barı tik ike däwlätle çişeleş tormışqa aşqanda häm Ğazzä fälästinlelär tarafınnan idarä itelgändä genä mömkin bulaçağın citkerde.
