Yaponiya prem’yer-ministrı Sanaê Takaiti ike il arasında Tayvan’ğa qağılışlı belderülär arqasında kiyerenkelek däwam itkändä Qıtay belän dialog urnaştıru çaqıruın yañarttı.

Takaiti düşämbe könne yaña yılnıñ berençe matbuğat oçraşuında xökümätneñ östenlekle yünäleşläre turında söylägändä ike il arasındağı borçılular häm qıyınlıqlarnı xäl itü öçen aralaşu- êlemtäneñ möhim buluın belderde.

“Kyodo” agentlığı xäbär itüençä, Takaiti “İlebez Qıtay belän törle dialog mömkinleklärgä açıq häm berqayçan da işeklärne yapmadı” dip belderde.

Takaiti bu süzlärne Qıtaynıñ Yaponiyädäge ilçelege şimbä könge belderüendä Yaponiyäneñ qayber öleşlärendä cämäğat’ qurqınıçsızlığı şartlarınıñ naçarlanuın bilgeläp ütkännän häm Qıtay grajdannarına yaqın kiläçäktä Yaponiyägä barudan saqlanırğa kiñäş itkännän soñ äytte.

Yaponiya räsmilärennän Qıtay ilçelegeneñ soñğı belderüenä qarata bernindi cawap bulmadı.

Takaiti uzğan yılnıñ 7 nçe noyabrendä Qıtaynıñ Tayvan’ğa höcüme zakonlı räweştä yäşäwgä yanağan qurqınıç bulıp tora ala dip äytkännän soñ häm monıñ Yaponiyägä kollektiv üz-üzeñne yaqlaw xoquqın qullanırğa mömkinlek birüen citkerüennän soñ Qıtay belän Yaponiya arasında kiyerenkelek arttı.

Takaitineñ belderüläre Pekinda kiñqırlı reakśiyälärgä kiterde, Qıtay Yaponiyägä säyäxät itmäskä kiñäş itte häm törle çikläw çaraları, şul isäptän diñgez produktların importlawnı yañadan tıyunı ğamälgä aşırdı.