Venesuêlada ber-ber artlı bulğan ike cir teträwdä hälaq buluçılar sanı 1 meñ 430ğa citkän.
BMO isä afät ilgä 6,7 milliard dollar külämendä fizik zıyan kitergän dip farazlıy.
Milli Mäcles başlığı Xorxe Rodriges şimbä könne iğlan itkän soñğı räsmi mäğlümatlarğa qarağanda, cirteträwlärdä 3 meñ 238 keşe yaralanğan.
Berläşkän Millätlär Oyışmasınıñ gumanitar yärdäm koordinatorı Tom Fletçer ber kön êlek yasağan belderüendä 50 meñnän artıq keşeneñ yuğalğan buluın äytep, ülüçelär sanı tağın da artırğa mömkin dip kisätte.
AQŞ tarafınnan xuplanğan Venesuêlanıñ waqıtlıça liderı Delsi Rodriges ilneñ yalgız tügellegen äytte.
BMOnıñ gumanitar êşlärne koordinasiyäläw ofisı kim digändä 17 ildän êzläw-qotqaru törkemnäreneñ isän qalğan keşelärgä ireşü öçen töbäkkä cibärelüen açıqladı.
Belgeçlär tabiği afätlärdän soñ isän qalğannarnı tabu öçen berençe 72 säğatneñ ayıruça möhim buluın belderä.
Cirteträwdä iñ küp zıyan kürgän başqala Karakasnıñ tön’yağındağı yar buyı rayonı La -Guayrada comğa könne ber sabıynıñ cimereklär astınnan isän kileş çığarıluı zur söyeneç tudırdı.
Sabıy 7,2 häm 7,5 zurlığındağı cir teträwlärdän yaqınça 32 säğat uzğaç töbäk xalqı tarafınnan qotqarıldı.
Berläşkän Millätlär Oyışması cirteträwlär kitergän turıdan-turı fizik zıyannıñ 6,7 milliard dollar buluın belderä, bu san Venesuêlanıñ milli tulayım tabışınıñ yaqınça 6%ın täşkil itä.
Turıdan-turı fizik zıyan 4,7 milliard dollardan 8,7 milliard dollarğa qadär bulırğa mömkin, läkin ğomumi iqtisadi täêsir turıdan-turı zıyannıñ 1,5–3 tapqırına citärgä mömkin.
Afättän zıyan kürgän keşelärgä aşığıç räweştä toraq,çista su, sanitariya häm gigiyena , sälamätlek saqlaw xezmätläre, saqlaw yärdäme häm töp yärdäm kiräk bulaçaq dip xäbär itelde.
Cirteträwlärdä hälaq buluçılar arasında 28 Portugaliya, 5 İspaniya, 2 Braziliya, 7 Qıtay häm 1 Çili watandaşı, şulay uq İtaliya–Venesuêla watandaşlığı bulğan 1 keşe dä bar.
Venesuêlanıñ tön’yaq yar buyları Karib diñgeze häm Könyaq Amerika tektonik plitaları çigendä urnaşqan.
Läkin 1997 yıldan birle anda zur cirteträwlär bulmağan.
