İslandiya “2026 Eurovision” cır bäygesendä qatnaşmayaçaq. Bu xaqta ilneñ däwlät telekanalı “RUV” çärşämbe könne xäbär itte. Säbäbe - uzğan atnada İzrailneñ yarışta qatnaşuı raslanu.

Kiläse “Eurovision” may ayında Venada ütkäreläçäk. İzrailgä anda qatnaşu röxsäte birelü qararınnan soñ Ispaniya, Niderland, İrlandiya häm Sloveniya, İzrailneñ Ğazzädäge ğamällärenä protes belderep, yarıştan çıqtı.

İslandiya uzğan atnada İzrailneñ qatnaşuın tawışqa quyunı taläp itkän illär arasında ide.

Läkin Awrupa tapşıruçılar berlege İzrailneñ qatnaşuı öçen tawış birü ütkärmäskä qarar qıldı. Anıñ urnına xökümätlärne yarışqa täêsir itüdän tıyuğa yünältelgän yaña qağıydälär kertelde.

İslandiya bu cır bäygesendä ber tapqır da ciñmäde, ämma 1999nçı häm 2009nçı yıllarda ikençe urınnı aldı.