Törkiyä ilbaşı Räcäp Tayyip Ärdoğan İzrailneñ Ğazzädä "tulı genotsid" başqaruın häm bu üterülär öçen turıdan-turı Benyamin Netanyaxu cawaplı buluın äytte.
Ärdoğan düşämbe könne BMO ğomum şurası qısalarında Nyu-Yorkkta “Fox News”qa birgän intervyusında: "Min monı başqaça añlata almıym. Bu tulı genotsid. Häm bu genotsid Netanyaxu tarafınnan başqarıla. Netanyaxu, räximsez räweştä, bu qanqoyışta küpme keşene üterde," – dip belderde.
Ul Ğazzädä 120 meñnän artıq keşeneñ törle cäräxätlär aluın häm Törkiyäneñ yaralanğan keşelärne däwalaw öçen üz ilenä qabul itüen äytte.
"Bez bu genotsidqa tulısınça qarşı," – dip östäde ul.
Fälästin qarşılıq törkeme “Xamas” häm anıñ totqınnarı turında soralğanda, Ärdoğan barlıq ğayepläwlärneñ älege oyışmağa ğına bäyle buluın kire qaqtı.
"Bu beryaqlı cinayät tügel. Min monda barı tik “Xamas”nı ğına ğayepläw döres bulmas dip uylıym. Şul uq waqıtta, Netanyaxu başqarğan êşlärne niçek kire qağıp bula?" – dip äytte ul.
Ul İzrailneñ tınıç xalıqqa qarşı ayırıp tormastan höcümnär başqaruın ğayepläde häm bolay dide: "Qoralğa kilgändä, (“Xamas”nı) İzrail belän çağıştırırlıq tügel, häm İzrail bu köçne räximsez räweştä qullana, 7 yäştän 70 yäşkä qadär, balalar, xatın-qızlar, olı yäştäge keşelär - bersen dä ayamıy."
Konfliktnı tuqtatu mömkinlegenä kilgändä, Ärdoğan moña şik belderde, anı älegä qadär xäl itelmägän Rusiyä-Ukraina suğışı belän çağıştırıp: "İsegezdäme, (AQŞ ilbaşı Donald Tramp) 'Min Rusiyä-Ukraina suğışın tuqtatam' digän ide. Tuqtadımı? Ul haman däwam itä. Şulay uq, ul 'Min Ğazzädäge suğışnı tämamlıym' dip äytte. Tämamlandımı? Yuq."
“Xamas”nı terrorçı oyışması dip sanıysızmı digän sorawğa ul: "Min “Xamas”nı terrorçı oyışması dip sanamıym. Kiresençä, min anı qarşılıq xäräkäte dip sanıym... Alar üzlären yaqlaw öçen bar bulğan mömkinleklärne qullana," - dip cawap birde.
Möselman dönyasınıñ İzrailgä qarşı berdämlege
Ärdoğan Nyu-Yorktağı “Törek Yortı”nda (Türkevi Üzäge) Küveyt täxet warisı Şäyex Sabah Xalid äl-Sabah belän oçraştı häm İzrailgä qarşı möselman dönyasınıñ berdämlegen maqtadı.
BMO ğomum şurası aldınnan Nyu-Yorkta ütkän bu oçraşuda ike il arasındağı mönäsäbätlär, regional' häm global' mäs'älälär tikşerelde, häm Ärdoğan Ğazzädä ut tuqtatuğa ireşü öçen söyläşülärne däwam itü kiräklegenä basım yasadı.
Törkiyä häm Küveyt arasında mönäsäbätlärne, bigräk tä säwdä ölkäsendä, üsterü möhimlegen assızıqlap, Ärdoğan ike ilneñ xezmättäşlekne nığıtu öçen êşläwne däwam itäçägen äytte.
Süriyä turında ilbaşı Ärdoğan, ildäge cir bötenlegen saqlaw belän bergä, torğızu häm üseşkä iğtibar birü möhimlegen citkerde häm Änkaranıñ Süriyäne yaqlawın qabatladı.
